गुहागर – गुहागर तालुक्यातील झोंबडी येथील ग्रामस्थांनी झोंबडी ग्रामपंचायतच्या बोगस कारभाराबाबत गुहागरचे गटविकास अधिकारी यांच्याकडे तक्रार दाखल केली होती. अखेर या तक्रारीची दखल घेत त्या तक्रारीवर 5 मार्च रोजी गुहागरचे गटविकास अधिकारी यांच्या समोर त्या बोगस कारभाराच्या तक्रार अर्जावर सुनावणी होणार आहे. त्यामुळे आता या सुनावणीमध्ये नक्की काय होणार ? याची चर्चा गुहागर तालुक्यासह संपूर्ण झोंबडी परिसरात सुरू आहे.
झोंबडी ग्रामपंचायतीचे विद्यमान सरपंच अतुल लांजेकर व ग्रामसेवक यांनी या ग्रामपंचायत मध्ये आपल्या पदाचा गैरवापर करत गैर कारभार केल्याचा आरोप समीर तावडे व ग्रामस्थांनी केला होता. यावेळी या गावांमध्ये तणावाचे वातावरण निर्माण झाले होते. ग्रामस्थांकडून पत्रकार परिषद घेत हे आरोप करण्यात आले होते तर याच आरोपांना सरपंच अतुल लांजेकर यांनी पत्रकार परिषद घेत सडेतोड उत्तर दिले होते. मात्र शासनाकडे केलेल्या तक्रारीची दखल घेतली गेली जात नसल्याने ग्रामस्थांमधून नाराजी व्यक्त केली जात होती.अखेर 5 मार्च रोजी गटविकास अधिकारी यांच्या दालनामध्ये त्या गैरकारभाराबाबत सुनावणी होणार असल्याचे पत्र नुकतेच ग्रामपंचायत व तक्रारदार यांना प्राप्त झाले आहे. ग्रामस्थांनी केलेले गैरकारभाराचे आरोप व सरपंच अतुल लांजेकर आणि ग्रामसेवक यांनी त्या आरोपांना दिलेले उत्तर यामध्ये नक्की आता काय निर्णय लागणार याची चर्चा संपूर्ण झोंबडी सुरू आहे.
