चिपळूण – चिपळूण शहरात भरदिवसा चोरीची एक खळबळजनक घटना समोर आली आहे. चिपळूण एसटी डेपोच्या परिसरात ‘आम्ही पोलीस आहोत’ अशी बतावणी करून दोन अज्ञात भामट्यांनी एका ८० वर्षीय वृद्धाची फसवणूक करत त्यांची सुमारे ९८ हजार रुपये किमतीची सोन्याची चैन लंपास केली. या घटनेमुळे चिपळूण शहरात खळबळ उडाली असून नागरिकांमध्ये भीतीचे वातावरण पसरले आहे.
चिपळूण येथील शांताराम दौलतराव साळवी हे रविवारी, १५ फेब्रुवारी रोजी सकाळी ११:३८ वाजण्याच्या सुमारास चिपळूण एसटी डेपोच्या बाजूला असलेल्या स्वागत हॉटेलसमोरील रस्त्यावरून जात होते. यावेळी पाठीमागून मोटारसायकलवरून दोन अज्ञात इसम तिथे आले. या दोन्ही अज्ञात इसमांनी साळवी यांना अडवले आणि आपण पोलीस असल्याची बतावणी केली. “पुढे तपासणी सुरू आहे, तुमचे दागिने काढून रुमालात ठेवा,” असे सांगून त्यांनी साळवी यांना विश्वासात घेतले. त्यांच्या सांगण्यावरून साळवी यांनी आपल्या गळ्यातील सोन्याची चैन, हातातील घड्याळ आणि घराची चावी काढून स्वतःच्या रुमालात ठेवली. भामट्यांनी तो रुमाल हातात घेतला आणि त्यामध्ये सर्व वस्तू असल्याचे भासवून तो रुमाल पुन्हा साळवी यांच्या हातात दिला. त्यानंतर ते दोघेही तातडीने मोटारसायकलवरून पसार झाले. ते दोघे निघून गेल्यावर साळवी यांनी संशयावरून तातडीने रुमाल उघडून पाहिला. त्यावेळी त्यांना धक्काच बसला. रुमालात घड्याळ आणि चावी होती, मात्र सुमारे २ तोळे वजनाची ९८,००० रुपये किमतीची सोन्याची चैन गायब होती. आपली फसवणूक झाल्याचे लक्षात येताच त्यांनी तात्काळ पोलीस ठाणे गाठले.
या प्रकरणी शांताराम साळवी यांनी दिलेल्या तक्रारीनुसार, चिपळूण पोलीस ठाण्यात अज्ञात दोन इसमांविरुद्ध गुन्हा दाखल करण्यात आला आहे. अधिक तपास चिपळूण पोलीस करत आहेत.
