गुहागर – गणेशोत्सवाच्या पार्श्वभूमीवर गुहागर तालुक्यातील एस.टी. प्रवाशांसाठी आनंदाची बातमी आहे. प्रवाशांची वाढती संख्या आणि तालुक्याची भौगोलिक गरज लक्षात घेऊन गुहागर एस.टी. आगाराच्या ताफ्यात ‘राजमाता जिजाऊ’च्या पाच नव्या बस दाखल झाल्या आहेत. परिवहन मंत्री प्रताप सरनाईक यांच्या प्रयत्नातून उपलब्ध झालेल्या या बसचे गुहागर आगारात उत्साहात लोकार्पण करण्यात आले.
गुहागर आगारात आयोजित कार्यक्रमात पंचायत समितीचे सभापती प्रणव पोळेकर व उपसभापती निलेश सुर्वे यांच्या हस्ते श्रीफळ वाढवून या नव्या बसचे उद्घाटन करण्यात आले. जिल्हा परिषद सदस्य नेत्रा ठाकूर यांच्या हस्ते पाचही ‘राजमाता जिजाऊ’ बसचे विधिवत पूजन करण्यात आले.
लोकार्पणानंतर गुहागर ते मोडकाआगर या मार्गावर या बसची पहिली फेरी काढण्यात आली. विशेष म्हणजे पंचायत समिती सभापती प्रणव पोळेकर, उपसभापती निलेश सुर्वे, जिल्हा परिषद सदस्य नेत्रा ठाकूर यांच्यासह महायुतीचे पदाधिकारी, कार्यकर्ते आणि एस.टी. महामंडळाच्या अधिकाऱ्यांनी स्वतः तिकीट काढून या बसमधून प्रवास केला. त्यामुळे लोकार्पण सोहळ्याला वेगळेच महत्त्व प्राप्त झाले. यावेळी बोलताना सभापती प्रणव पोळेकर म्हणाले की, “गुहागर आगारासाठी एकूण दहा राजमाता जिजाऊ बस देण्याचे आश्वासन परिवहन मंत्री प्रताप सरनाईक यांनी दिले आहे. त्यापैकी पहिल्या पाच बस आगारात दाखल झाल्या असून उर्वरित पाच बसही लवकरच उपलब्ध होतील.” गुहागर तालुक्याची भौगोलिक परिस्थिती आणि ग्रामीण भागातील प्रवाशांची गरज लक्षात घेता आगाराला पाच मिनीबस देण्याची मागणीही परिवहन मंत्र्यांकडे करण्यात आली असल्याचे पोळेकर यांनी सांगितले. गणेशोत्सवापूर्वी या मिनीबस उपलब्ध व्हाव्यात, अशी अपेक्षाही त्यांनी व्यक्त केली. उद्घाटन प्रसंगी नगरसेवक अमरदीप परचुरे, अमोल गोयथळे, साईनाथ कळझुणकर, सचिन ओक, प्रभारी गुहागर आगार व्यवस्थापक दीपक चव्हाण, वाहतूक निरीक्षक स्वप्नील शिंदे, मंदार कदम विजय चव्हाण पराग कांबळे एसटीचे अधिकारी कर्मचारी आणि नागरिक उपस्थित होते.
