चिपळूण – चिपळूण तालुक्यातील आकले-तळवडेवाडी येथे शारीरिक व मानसिक छळाला कंटाळून एका 27 वर्षीय विवाहितेने आत्महत्या केल्याची घटना नुकतीच घडली होती. या प्रकरणी पतीसह सासू-सासरा व दोन दिरांविरुद्ध अलोरे-शिरगाव पोलीस ठाणे येथे गुन्हा दाखल करण्यात आला आहे.
विजय भगवान मोहिते, भगवान शिवा मोहिते, कुसूम भगवान मोहिते, राजू भगवान मोहिते आणि नेताजी भगवान मोहिते (सर्व रा. आकले-तळवडेवाडी) अशी गुन्हा दाखल झालेल्यांची नावे आहेत. याबाबत फिर्याद विवाहितेचे वडील नामदेव लक्ष्मण मोहिते (वय 76, रा. पुणे) यांनी दिली आहे. पोलिसांनी दिलेल्या माहितीनुसार, जयश्री विजय मोहिते (वय 27) यांचा विवाह 3 जुलै 2017 रोजी विजय मोहिते याच्याशी झाला होता. विवाहानंतर सुमारे चार वर्षे संसार सुरळीत सुरू होता. मात्र अपत्य न झाल्याच्या कारणावरून 2022 पासून पती व सासरच्या मंडळींकडून जयश्री यांना शारीरिक तसेच मानसिक त्रास दिला जात होता, असा आरोप फिर्यादीत करण्यात आला आहे. या छळाला कंटाळून जयश्री मोहिते यांनी 23 डिसेंबर 2025 रोजी दुपारी सुमारे 2 वाजण्याच्या सुमारास विष प्राशन करून आत्महत्या केली. या घटनेनंतर तपासाअंती संबंधितांविरुद्ध आत्महत्येस प्रवृत्त केल्याप्रकरणी गुन्हा दाखल करण्यात आला आहे. पुढील तपास पोलीस करत आहेत.
