गुहागर – गुहागर नगरपंचायत निवडणूक अंतिम टप्प्यात पोहचली असताना या अंतिम टप्प्यात चुरस आणि उत्सुकता निर्माण झाली आहे. एकीकडे नगराध्यक्ष पदासाठी चार उमेदवार रिंगणात आहेत. तर 17 जागांसाठी अनेक जण आपले नशिब आजमावत आहेत. मात्र सगळ्यात जास्त चर्चा ही पिता- पुत्रांची आहे कारण हे पिता -पुत्र वेगवेगळ्या पक्षाकडून निवडणूक लढवत आहेत.
गुहागर नगरपंचायत निवडणुकीमध्ये उद्धव बाळासाहेब ठाकरे शिवसेना गट, भाजप शिवसेना युती व राष्ट्रवादी या महायुतीतील घटक पक्षांमध्येच रस्सीखेच पहावयास मिळत आहे. नगरपंचायत चे निर्माण झाल्यापासून पहिला टर्म मध्ये भास्कर जाधव यांच्या नेतृत्वाखाली राष्ट्रवादीने ही नगरपंचायत ताब्यात घेतली होती तर दुसऱ्या टर्ममध्ये गुहागर शहर विकास आघाडीच्या माध्यमातून राजेश बेंडल यांनी या नगरपंचायतीवर आपला झेंडा लावला होता आता मात्र या नगरपंचायत वर कोणता पक्ष आपला झेंडा फडकवणार याची चर्चा सुरू आहे. त्यातच काही ठिकाणी लढती या एकाच घरातले नातेवाईक वेगवेगळ्या पक्षांकडून लढत असल्याने त्यांचे नातेवाईक व मित्रमंडळी यांचे समर्थन नक्की कोणत्या पक्षाला समर्थन मिळेल याची चाचपणी सर्वच राजकीय पक्ष करत आहेत.
यामध्ये कुणबी समाजातील प्रमुख नेते म्हणून ओळखले असलेले राजेंद्र भागडे हे शिवसेना भाजप युतीकडून प्रभाग 13 मधून आपले नशीब आजमावत आहेत. तर प्रभाग 14 मधून भाजपाचे संजय मालप युतीच्या माध्यमातून लढत असताना या ठिकाणी मात्र राष्ट्रवादी कडून शिवसेनेचे नेते राजेंद्र भागडे यांचे चिरंजीव सौरभ भागडे हे निवडणूक लढवत आहे. त्यामुळे या पिता पुत्रांना नक्की कोणता पक्ष कोणत्या वार्डमध्ये मतदान करणार याची चर्चा संपूर्ण गुहागर शहरात सुरू आहे. एकीकडे शिवसेना-भाजप युतीकडून राजेंद्र बागडे हे उभे राहिल्याने त्यांना भाजप संपूर्ण सहकार्य करत असल्याचा चित्र दिसतंय तर त्यांचाच मुलगा त्याच युतीच्या विरोधात लढत असल्याने भाजपमधून मात्र संताप आणि नाराज व्यक्त केली जात आहे. त्यामुळे येणारे काही दिवसात या दोन्ही पिता पुत्रांच्या उमेदवारीबाबत जर विचार केला तर याचे परिणाम संपूर्ण प्रभागातील मतदानावर पडतील की काय अशी चर्चा आता गुहागर शहरात रंगू लागली आहे. तर काहीजणांचे म्हणणं असंच आहे काही झालं तरी नगरसेवक पद आपल्याच घरात आले पाहिजे यासाठीच या पिता-पुत्रांनी ही निवडणूक लढवली असल्याची चर्चा गुहागरच्या चौका चौकात आणि नाक्या नाक्या सुरू आहे. या सर्व भानगडीत युती युतीमधील भाजप आणि शिवसेनेत मात्र दरार निर्माण होण्याची शक्यता व्यक्त केली जात आहे.
