गुहागर – गुहागर तालुक्यातील राजकीय घडामोडींना वेग आला असून, शृंगारतळी जिल्हा परिषद गटात उद्धव बाळासाहेब ठाकरे शिवसेनेने संघटनात्मक पातळीवर महत्त्वाची खेळी केली आहे. आमदार भास्कर जाधव यांचे निष्ठावंत कार्यकर्ते आणि झोंबडी गावचे सरपंच अतुल लांजेकर यांची शृंगारतळी जिल्हा परिषद गटाच्या विभागप्रमुखपदी नियुक्ती जाहीर करण्यात आली.
चिपळूण येथील पक्ष कार्यालयात आमदार भास्कर जाधव यांच्या हस्ते लांजेकर यांना नियुक्तीपत्र देण्यात आले. या नियुक्तीमुळे शृंगारतळी जि. प. गटात ठाकरे सेनेची संघटनात्मक ताकद आणखी वाढणार असल्याचे बोलले जात आहे.
सर्वसामान्यांच्या प्रश्नांसाठी धावून जाणारा आणि कार्यकर्त्यांशी जिव्हाळ्याचे संबंध ठेवणारा चेहरा म्हणून अतुल लांजेकर यांची तालुक्यात ओळख आहे. झोंबडी ग्रामपंचायतीचे सरपंच म्हणून काम करताना त्यांनी विविध विकासकामांना चालना दिल्याने त्यांचा जनसंपर्कही मजबूत असल्याचे पक्षाकडून सांगण्यात आले. नवीन जबाबदारीमुळे आता शृंगारतळी जि. प. गटातील पक्ष संघटना अधिक मजबूत करण्याचे मोठे आव्हान लांजेकर यांच्यासमोर असणार आहे. सर्व समाजघटकांना सोबत घेऊन शिवसेनेची विचारधारा तळागाळापर्यंत पोहोचविण्यासाठी आणि नव्या कार्यकर्त्यांची फळी उभी करण्यासाठी ते प्रयत्नशील राहणार आहेत. नियुक्तीपत्र देताना आमदार भास्कर जाधव यांनी हिंदुहृदयसम्राट स्वर्गीय बाळासाहेब ठाकरे यांचे विचार आणि पक्षप्रमुख उद्धवसाहेब ठाकरे यांची ध्येयधोरणे तळागाळातील जनतेपर्यंत पोहोचवून पक्ष संघटना अधिक बळकट करण्यासाठी काम करण्याच्या शुभेच्छा दिल्या.
अतुल लांजेकर यांच्या नियुक्तीची घोषणा होताच शिवसैनिक आणि समर्थकांमध्ये उत्साहाचे वातावरण निर्माण झाले असून, अभिनंदनाचा वर्षाव सुरू झाला आहे. आगामी स्थानिक स्वराज्य संस्थांच्या राजकारणाच्या पार्श्वभूमीवर ही नियुक्ती महत्त्वाची मानली जात आहे.
यावेळी जिल्हाप्रमुख विक्रांत जाधव, तालुकाप्रमुख सचिन बाईत, ज्येष्ठ शिवसैनिक विनायक मुळ्ये चिखली येथील मधुकर सावंत यांच्यासह मोठ्या संख्येने शिवसैनिक उपस्थित होते.
