कराड – ( विजया माने ) – कराड नगरपरिषद निवडणुकीत सोमवारचा दिवस कराडकरांच्या राजकीय आठवणीत कायमस्वरूपी कोरला जाईल असा ठरला. नगराध्यक्षपदासाठीचे सर्व नऊ उमेदवार एकाच व्यासपीठावर एकत्र उभे राहून शहराच्या भविष्यासंबंधी आपली भूमिका, विकास आराखडा आणि सर्वंकष व्हिजन नागरिकांसमोर मांडताना दिसले. सर्व उमेदवारांची शतप्रतिशत उपस्थिती हेच या कार्यक्रमाचे वैशिष्ट्य ठरले असून कराडच्या परिपक्व, सभ्य आणि सकारात्मक राजकीय संस्कृतीचे हे ज्वलंत उदाहरण असल्याचे शहरभरात समाधान व्यक्त होत आहे.
शिवाजीनगर हाऊसिंग सोसायटी येथील छत्रपती शिवाजी उद्यानाजवळ छ. शिवाजी उद्यान ग्रुपतर्फे या मुक्त संवादाच्या चर्चासत्राचे आयोजन करण्यात आले होते. शिक्षण, वैद्यकीय सुविधा आणि व्यापारी व्यवहारांच्या दृष्टीने वेगाने विस्तारत असलेल्या कराड शहरातील नागरिकांच्या मनात अनेक प्रश्न दाटलेले असताना त्यांना थेट उमेदवारांकडून उत्तर मिळावे, या उद्देशाने हा उपक्रम राबविण्यात आला. अपेक्षेपेक्षा मोठ्या प्रमाणात नागरिकांची उपस्थिती आणि त्यांनी उमेदवारांच्या भूमिकांना दिलेला सकारात्मक प्रतिसाद पाहून कार्यक्रमाला विशेष यश मिळाले.
चर्चासत्राची वैशिष्ट्यपूर्ण बाब म्हणजे कोणत्याही उमेदवाराने एकमेकांविरोधात आरोप-प्रत्यारोपांची भाषा न वापरता केवळ विकास, पायाभूत सुविधा, नागरी समस्यांचे दीर्घकालीन समाधान, वाढत्या शहरीकरणाला पूरक असा आराखडा आणि कराडचे पुढील दहा ते पंधरा वर्षांचे भविष्य यांवर आधारित भूमिका मांडल्या. शहरातील वाढती लोकसंख्या, वाहतूक व्यवस्था, पाणीपुरवठा, स्वच्छता, ड्रेनेज यांसारख्या मूलभूत सोयींच्या उभारणीसाठी एकात्मिक नियोजन गरजेचे असल्याचे सर्वच उमेदवारांच्या मतांतून स्पष्ट झाले.
कार्यक्रमाच्या शेवटी सर्व उमेदवारांनी हातात हात घालून सकारात्मक, स्वच्छ आणि सभ्य राजकारणाचा संदेश दिला. हा क्षण कार्यक्रमातील सर्वांत प्रतीकात्मक आणि कराडच्या राजकीय वातावरणाला नवी दिशा देणारा ठरल्याचे नागरिकांनी नमूद केले. आधुनिक महाराष्ट्राचे शिल्पकार यशवंतराव चव्हाण यांच्या पुण्यतिथीच्या पूर्वसंध्येला विकास आणि सलोख्याचा असा अनोखा उपक्रम कराडमध्येच घडू शकतो, असा अभिमान अनेक कराडकरांनी व्यक्त केला.छ. शिवाजी उद्यान ग्रुपतर्फे हा अनोखा उपक्रम राबविण्यात आला. सभ्यतेचे, एकतेचे आणि विकासाभिमुख राजकारणाचे दर्शन घडवणारा हा कार्यक्रम कराड शहराच्या राजकीय इतिहासात एक सुवर्ण पान म्हणून नोंदला जाणार आहे.
