गुहागर – गुहागर नगरपंचायतीच्या निवडणुकीत भाजपच्या उमेदवाराने मत मागायला आमच्या दारात येऊ नये अशी सूचना गुहागर शहरातील विश्व हिंदू परिषदेचे कार्यकर्ते गजानन दीक्षित यांनी विहिपच्या नोटीस बोर्डवर लिहून ठेवली आहे. यामुळे शहरातील भाजप कार्यकर्त्यांमध्ये एकच गोंधळ उडाला असून हा नाराजीचा संदेश शहरामध्ये चर्चेचा विषय ठरला आहे.
गुहागरमध्ये नगरपंचायत निवडणुकीची धामधूम सुरु आहे. उमेदवार अर्ज भरण्याची प्रक्रियाही सुरु झाली असून सर्वच पक्षांच्या उमेदवारांनी प्रचाराला सुरुवात केली आहे. यावेळी भाजपनेही आपले उमेदवार या निवडणुकीसाठी उभे केले आहेत. अशावेळी विश्व हिंदू परिषदेच्या जुन्या, अनुभवी कार्यकर्त्याने आपल्या घराच्या बाहेर नोटीस बोर्डवर भाजपच्या उमेदवाराने मत मागायला आमच्या दारात येऊ नये अशा आशयाची सूचना करुन आपली नाराजी व्यक्त केली आहे. विहिपचे दीक्षित यांनी सांगितले की, दाभोळ कंपनीच्या काळात आम्ही अंगावर केसेस घेतल्या मात्र, यातील काहींनी ठेका घेतला. तसेच इतर पक्षांतून आलेल्यांना भाजपमध्ये जिल्ह्या पातळीवरील उच्च पदे मिळतात. तसेच उमेदवारीही देण्यात आलेली आहे. आम्ही आयुष्यभर सतरंज्या उचलायच्या आणि नव्यानी निवडणुका लढवायच्या अशी आपली संतप्त भूमिका मांडून आपली भाजपवरील नापसंती व्यक्ती केली आहे.
– भाजपच्या श्रध्दा घाडे यांचा राजीनामा
गुहागर शहरातील भाजपच्या श्रध्दा घाडे यांनी आपला राजीनामा दिला आहे. पक्षाच्या कोणत्याही बैठकीला न बोलावणे, इतरवेळी कार्यक्रमांना टाळणे असे प्रकार सातत्याने होत असल्याने घाडे यांनी आपल्या पदाचा राजीनामा दिला आहे. त्यामुळे ऐन नगरपंचायत निवडणुकीत भाजपमधूनच धक्कातंत्र पक्षाला बसत असल्याने उमेदवारांची धाकधूकी वाढली आहे.
