चिपळूण – चिपळूण शहर परिसरातील पूररेषा निश्चित करणाऱ्या शासनाकडून निर्देशित केलेल्या लाल व निळ्या रेषेमुळे चिपळूण शहराचे दोन वर्ग झाले आहेत. एका वर्गात निषिद्ध क्षेत्र, तर दुसऱ्या वर्गाला नियंत्रित क्षेत्र संबोधले गेले आहे. निषिद्ध क्षेत्रामध्ये नदीच्या डाव्या व उजव्या तीरानजीकची निळी पूररेषा तर नियंत्रित क्षेत्रामध्ये दोन्ही तीरावरील निळ्या रेषेपासून त्याच ठिकाणी असलेली लाल रेषा यामधील क्षेत्राला नियंत्रित क्षेत्रात सामावण्यात आले आहे. या रेषांमुळे नव्या बांधकामांना अडचणी तर जुन्या बांधकामांसाठी पुनर्बांधणीला अडचणी नसल्याचे सांगितले जाते. मात्र, या रेषांमुळे चिपळूणचा मोठा नागरी वस्तीचा भाग बाधित झाल्याने या रेषा रद्द करण्याची मागणी होत आहे.
चिपळूण नगर परिषदेने नागरिकांसाठी दिलेल्या जाहीर सुचनेनुसार कार्यकारी अभियंता, रत्नागिरी पाटबंधारे विभाग कार्यालयाकडून सप्टेंबर २०२१ मध्ये आलेल्या पत्राप्रमाणे शहरातील वाशिष्ठी व शिव नदीच्या तिरावर निळी व लाल रेषेचे मार्किंग केलेले नकाशे जलसंपदा विभागास प्राप्त झाले आहेत. राज्य शासनाच्या जलसंपदा विभाग शासन परिपत्रक ३ मे २०१८ व एकीकृत विकास नियंत्रण प्रोत्साहन नियमावली २०२०(बांधकाम नियमावली) मधील नियम क्र. ३,१,३ मध्ये निळी व लाल रेषा संदर्भात मार्गदर्शक सूचना प्रसिद्ध करण्यात आली.त्याप्रमाणे निळी रेषेअंतर्गत सरासरीनुसार २५ वर्षांतून एकदा अथवा वारंवार येणारा पूर, त्यामध्ये बाधीत होणारे क्षेत्र दर्शविण्यात आले आहे. तर लाल रेषेमध्ये सरासरीने शंभर वर्षातून एकदा अथवा वारंवार येणारा पूर दर्शविण्यात आला आहे. निषिद्ध क्षेत्रातील कोणत्याही नव्या बांधकामांना परवानगी मिळणार नाही. मात्र, जुन्या अथवा पुनर्बांधणी बांधकामांना परवानगी दिली जाणार आहे. तर नियंत्रित क्षेत्रामध्ये लाल व निळ्या रेषा या भागांच्या दरम्यान नवीन बांधकाम करताना इमारतीचा तळमजला, जोत्याची पातळी लाल पूररेषा पातळीवर प्रस्तावित बांधकामास व निळ्या पूररेषेमध्ये शहरातील गोवळकोट परिसरातील काही भाग, पेठमाप परिसरातील तांबटआळी, परीटआळी, गोवळकोट रोड, मुरादपूर, मुरादपूर मोहल्ला, वडार कॉलनी, शंकरवाडी, वाणीआळी, बापट आळी, बेंदरकरआळी, भोगाळे परिसर, बाजारपेठ, मार्कंडी व काविळतळी, पागमळा काही भाग, महालक्ष्मीनगर आदींचा समावेश आहे. तर लाल रेषेबाहेरील क्षेत्रामध्ये राधाकृष्णनगर, ओऑसिस हॉटेलच्या मागील भाग, रावतळे, मतेवाडी, डीबीजे महाविद्यालय परिसर, इंडियन ऑईल पेट्रोल पंप ते हॉटेल हायवे (ऑक्ट्रॉय नाक्याकडे जाताना महामार्गावरील डावीकडील भाग) हायवे हॉटेल ते एसएमएस हॉस्पिटलपर्यंत वरील बाजूस (पागझरीकडील)परिसर, पॉवर हाऊस, पाग, डॉमिनोजची वरील बाजू (पाग भागाकडे), देसाई बाजारचा वरील भाग (पाग भागाकडे), खेंड, गुहागर बायपास भागातील डोंगराळ भाग तसेच गोवळकोट किल्ल्याजवळील डोंगराळ भाग आदींचा समावेश आहे.
सर्वसाधारणपणे निळी पूररेषा ही महामार्गाला समांतर आहे. लाल व निळी पूररेषा शहराच्या विकासाला मोठी अडचणीची ठरणार असून एकीकडे दोन्ही रेषांतर्गत नवी बांधकाम परवानगी मिळणार नाही, तर दुसरीकडे मात्र रेषांतर्गत असलेल्या नागरी वस्तीमधील पुनर्बांधणीकामांना परवानगी मिळणार आहे.
