खेड – गणेशोत्सवासाठी चिपळूणच्या दिशेने दुचाकीवरून प्रवास करणाऱ्या दोघांवर खेड तालुक्यातील खवटी येथे अपघाताचे संकट ओढवले. मुंबई-गोवा महामार्गावरील खवटी गावानजीक दत्त मंदिरासमोर रविवारी सकाळी अपघात झाला. दुचाकीवरील नियंत्रण सुटल्याने ती महामार्गालगत असलेल्या सुमारे २५ ते ३० फूट खोल खड्ड्यात जाऊन कोसळली. या दुर्घटनेत दुचाकीचालक सतीश निवृत्ती पाटे यांचा मृत्यू झाला असून, मागे बसलेल्या अक्षता अरविंद कवडे या गंभीर जखमी झाल्या आहेत.
मिळालेल्या माहितीनुसार, सतीश पाटे आणि अक्षता कवडे हे दोघे गणेशोत्सवाच्या निमित्ताने पोलादपूरहून चिपळूणच्या दिशेने दुचाकीने निघाले होते. खवटी येथील दत्त मंदिरासमोर आल्यानंतर दुचाकीवरील नियंत्रण सुटल्याने वाहन महामार्गाच्या कडेला असलेल्या खोल खड्ड्यात कोसळले. अपघाताची माहिती मिळताच घटनास्थळी मदतकार्य सुरू करण्यात आले. जगद्गुरु रामनंदाचार्य श्री नरेंद्राचार्यजी महाराज संस्थान, नाणीजधाम यांच्या रुग्णवाहिकेने घटनास्थळी धाव घेतली. रुग्णवाहिकेच्या मदतीने दोघांनाही कळंबणी उपजिल्हा रुग्णालयात नेण्यात आले. रुग्णालयात वैद्यकीय तपासणीनंतर सतीश पाटे यांना मृत घोषित करण्यात आले. गंभीर जखमी झालेल्या अक्षता कवडे यांच्यावर उपचार सुरू आहेत.गणेशोत्सवाच्या पार्श्वभूमीवर कोकणाकडे मोठ्या प्रमाणात वाहतूक सुरू असताना हा अपघात घडल्याने महामार्गावरील सुरक्षित प्रवासाचा प्रश्न पुन्हा ऐरणीवर आला आहे. या घटनेमुळे पोलादपूर व चिपळूण परिसरात हळहळ व्यक्त होत आहे.
