गुहागर – घराच्या दरवाजाची कडी-कोयंडा न तुटता, खिडकीला कोणतीही इजा न होता बंद घरातील पर्समधून सोन्या-चांदीचे दागिने आणि रोख रक्कम असा तब्बल १ लाख ७१ हजार ४२ रुपयांचा मुद्देमाल चोरीला गेल्याने गुहागर तालुक्यात खळबळ उडाली आहे. वेळंब गुरववाडी येथे घडलेल्या या प्रकारामुळे गुहागर पोलिसांसमोर चोरीचा छडा लावण्याचे नवे आव्हान उभे राहिले आहे.
१३ सप्टेंबरच्या रात्री ९ वाजल्यापासून १४ सप्टेंबरच्या सकाळी ९ वाजेपर्यंतच्या कालावधीत ही चोरी झाल्याचे समोर आले आहे. फिर्यादी पुनम गुरव या सध्या मुंबई येथे राहत असून, त्यांच्या वेळंब गुरववाडी येथील घरात हा प्रकार घडला. विशेष म्हणजे, चोरट्याने घरात प्रवेश करताना दरवाजा, कडी-कोयंडा किंवा खिडकीची कोणतीही तोडफोड केल्याचे आढळून आलेले नाही. घरातील पर्समधून सोन्याचे मंगळसूत्र, साखळ्या, अंगठ्या, झुमके, नथ तसेच चांदीचे दागिने आणि ४ हजार ३०० रुपयांची रोकड चोरीस गेली आहे. या घटनेमुळे चोरीची पद्धत आणि चोरट्याने घरात प्रवेश कसा केला, याबाबत प्रश्न उपस्थित झाले आहेत. घराची माहिती असलेली व्यक्ती, घरातील परिस्थितीची पूर्वकल्पना किंवा अन्य कोणती शक्यता आहे का, या सर्व बाबींचा तपास पोलिसांकडून केला जात आहे. घरात कोणतीही तोडफोड न करता झालेली चोरी ही पोलिसांसाठी महत्त्वाची बाब ठरत आहे. घटनास्थळावरील परिस्थिती, उपलब्ध पुरावे आणि इतर तांत्रिक बाबींच्या आधारे पोलिस तपासाची दिशा निश्चित होणार आहे. त्यामुळे या प्रकरणाचा तपास कितपत वेगाने पुढे जातो आणि अज्ञात चोरट्यापर्यंत पोहोचण्यासाठी पोलिस कोणती भूमिका घेतात, याकडे नागरिकांचे लक्ष लागले आहे.याप्रकरणी गुहागर पोलिस ठाण्यात गुन्हा नोंद करण्यात आला असून अज्ञात चोरट्याचा शोध घेण्यासाठी पोलिसांकडून तपास सुरू आहे.
