गुहागर : शृंगारतळी येथे आयोजित रामरक्षा महाआरतीच्या कार्यक्रमात आमदार भास्कर जाधव यांनी भाजपवर जोरदार निशाणा साधताना, “भाजपमध्ये मटका किंग जास्त आहेत,” असा टोला लगावला. त्यांच्या या वक्तव्याने गुहागर आणि शृंगारतळी परिसरातील राजकीय वातावरण चांगलेच तापले असून, जाधव यांच्या वक्तव्याचा नेमका रोख कोणाकडे होता, याबाबत राजकीय चर्चांना उधाण आले आहे.
रामरक्षा महाआरतीच्या धार्मिक कार्यक्रमात बोलताना आ. जाधव यांनी सद्य राजकीय परिस्थितीवर भाष्य केले. यावेळी त्यांनी भाजपच्या राजकारणावर टीका करत ‘मटका किंग’ असा उल्लेख केल्याने उपस्थितांमध्येही या वक्तव्याची चर्चा रंगली.
‘मटका किंग’ नेमका कोण? गुहागरात चर्चेला उधाण
आ. जाधव यांच्या वक्तव्यानंतर शृंगारतळी आणि गुहागर परिसरात “भाजपमध्ये मटका किंग कोण?” हा प्रश्न चर्चेचा विषय ठरला आहे. जाधव यांनी कोणत्याही व्यक्तीचे नाव स्पष्टपणे घेतले नसले, तरी त्यांच्या वक्तव्याचा रोख नेमका कोणत्या व्यक्तीकडे किंवा कोणत्या स्थानिक राजकीय नेत्याकडे आहे, याबाबत तर्क-वितर्क सुरू झाले आहेत. दरम्यान, या वक्तव्यामुळे स्थानिक पातळीवर आणखी एक प्रश्न उपस्थित झाला आहे. जर परिसरात अवैध मटका व्यवसाय सुरू असल्याचा दावा किंवा आरोप केला जात असेल, तर अशा प्रकारच्या मटका व्यवसायावर पोलिस प्रशासनाची भूमिका काय आहे? असा सवाल नागरिकांकडून उपस्थित केला जात आहे.
पोलिस प्रशासन कारवाई करणार का?
मटका अथवा तत्सम अवैध जुगार सुरू असल्याची माहिती प्रशासनाला मिळाल्यास संबंधित यंत्रणेकडून त्याची चौकशी व कायदेशीर कारवाई अपेक्षित असते. त्यामुळे आमदार भास्कर जाधव यांच्या वक्तव्याची दखल घेऊन गुहागर पोलिस प्रशासन या कथित मटका व्यवसायाबाबत चौकशी करणार का? तसेच परिसरात अशा प्रकारचा अवैध व्यवसाय सुरू असल्यास त्यावर कारवाई होणार का, याकडे नागरिकांचे लक्ष लागले आहे.
आ. जाधव यांच्या एका वक्तव्यामुळे आता राजकीय आरोप-प्रत्यारोपांसोबतच कायदा-सुव्यवस्थेचाही मुद्दा चर्चेत आला आहे. त्यामुळे त्यांच्या वक्तव्याचा नेमका संदर्भ काय, त्यांनी ‘मटका किंग’ हा शब्द कोणाला उद्देशून वापरला आणि पोलिस प्रशासन याबाबत काय भूमिका घेते, हे आगामी काळात स्पष्ट होण्याची शक्यता आहे. दरम्यान, संबंधित व्यक्ती किंवा भाजपकडून या वक्तव्यावर कोणती अधिकृत प्रतिक्रिया येते, याकडेही गुहागरातील राजकीय वर्तुळाचे लक्ष लागले आहे.
