चिपळूण – वाशिष्ठी नदीच्या काठावर कपडे धुण्यासाठी गेलेल्या आईवर अचानक मगरीने हल्ला केला आणि तिला खोल पाण्यात ओढण्याचा प्रयत्न केला. मात्र, मृत्यू समोर उभा ठाकलेला असतानाही अवघ्या १० वर्षांच्या स्वर्णी पवार हिने क्षणाचाही विलंब न करता आईच्या मदतीसाठी धाव घेतली. आईचा हात घट्ट पकडून आपल्या इवल्याशा हातांनी तिला पाण्याबाहेर खेचत या चिमुकलीने आईचा जीव वाचवला. वालोपे गणेशवाडी येथे घडलेल्या या थरारक घटनेने संपूर्ण चिपळूण तालुका हादरला असून, स्वर्णीच्या अतुलनीय धाडसाचे सर्वत्र कौतुक होत आहे.
वालोपे गणेशवाडी येथील नंदिनी भुपेंद्र पवार या शुक्रवारी सायंकाळी सुमारे ६ वाजण्याच्या सुमारास आपली १० वर्षांची मुलगी स्वर्णी हिच्यासोबत घराच्या मागील बाजूस असलेल्या वाशिष्ठी नदीच्या घाटावर कपडे धुण्यासाठी गेल्या होत्या. कपडे धुत असतानाच नदीच्या पाण्यात दबा धरून बसलेल्या अजस्त्र मगरीने अचानक नंदिनी पवार यांच्यावर झडप घातली. क्षणार्धात मगरीने त्यांच्या पायाचा जबड्यात पकड घेतला आणि त्यांना खोल पाण्याच्या दिशेने ओढण्यास सुरुवात केली. अचानक झालेल्या या जीवघेण्या हल्ल्याने नंदिनी पवार घाबरून गेल्या. त्यांनी मदतीसाठी आरडाओरड केली. मात्र, त्या प्रसंगीही त्यांनी प्रसंगावधान राखत नदीकाठावरील एका मोठ्या दगडाचा आधार घेतला आणि तो घट्ट पकडून ठेवला. एका बाजूला मगर त्यांना पाण्यात खेचत होती, तर दुसऱ्या बाजूला त्या जीव वाचवण्यासाठी काठाला धरून झुंज देत होत्या.आईची ही अवस्था पाहून १० वर्षांची स्वर्णी मात्र घाबरली नाही.आईला मगरीच्या तावडीतून सोडवण्यासाठी ही चिमुकली थेट धावून गेली. तिने आईचा हात घट्ट पकडला आणि आपल्या संपूर्ण ताकदीनिशी तिला पाण्याबाहेर खेचण्यास सुरुवात केली. स्वर्णीच्या या धाडसी प्रयत्नांमुळे नंदिनी पवार यांची मगरीच्या जबड्यातून सुटका झाली. काही क्षणांचा हा थरार संपल्यानंतर जखमी नंदिनी यांना तातडीने कामथे रुग्णालयात उपचारासाठी दाखल करण्यात आले असून त्यांच्यावर उपचार सुरू आहेत.
आईसाठी ‘सुपरहिरो’ ठरली स्वर्णी!
मगरीच्या जबड्यात अडकलेल्या आईला वाचवण्यासाठी अवघ्या दहा वर्षांच्या स्वर्णीने दाखवलेले धाडस अक्षरशः थरारक आहे. स्वतःच्या जीवाची पर्वा न करता तिने आईचा हात पकडून तिला मगरीच्या तावडीतून बाहेर काढले.ज्या वयात मुलांच्या हातात खेळणी असतात, त्या वयात स्वर्णीने आईचा जीव वाचवण्यासाठी मृत्यूशी दोन हात केले. स्वर्णीच्या या शौर्यामुळे ती केवळ पवार कुटुंबाचीच नव्हे, तर संपूर्ण चिपळूणची ‘चिमुकली वीरांगना’ ठरली आहे. तिच्या धाडसाचे कौतुक करताना अनेकांकडून “स्वर्णीच्या शौर्याला सलाम!” अशी प्रतिक्रिया व्यक्त होत आहे.
