गुहागर – वाढदिवस म्हणजे केक कापणे, शुभेच्छांचा वर्षाव आणि जल्लोष; मात्र गुहागर तालुक्याचे तालुका आरोग्य अधिकारी डॉ. घनश्याम जांगीड यांनी आपल्या ५० व्या वाढदिवसानिमित्त समाजाभिमुख उपक्रम राबवत एक वेगळाच आदर्श निर्माण केला. त्यांनी कोळवली येथील ज्ञान प्रसारक शिक्षण संस्थेच्या माध्यमिक विद्यालय पंचक्रोशी कोळवली हायस्कूलमधील सर्व विद्यार्थिनींना मोफत छत्र्यांचे वाटप करून वाढदिवस साजरा केला.
या उपक्रमामुळे विद्यार्थिनींच्या चेहऱ्यावर आनंद फुलला. यावेळी विद्यार्थिनींशी संवाद साधताना डॉ. जांगीड यांनी मोबाईल आणि सोशल मीडियाच्या अतिरेकापासून दूर राहण्याचा सल्ला दिला. “शिक्षणावर लक्ष केंद्रित करा, मोठी स्वप्ने पाहा आणि ती पूर्ण करण्यासाठी मेहनत घ्या. आपल्या आई-वडिलांसह गावाचे नाव उज्ज्वल करा,” असा प्रेरणादायी संदेश त्यांनी दिला.
तसेच किशोरवयीन मुलींसाठी आरोग्य विभागाकडून राबविण्यात येणाऱ्या विविध योजनांचा व आरोग्यविषयक सेवांचा लाभ घेण्याचे आवाहनही त्यांनी केले.
या कार्यक्रमास विद्यालयाचे मुख्याध्यापक विजय पिसाळ, शिक्षक बाळासाहेब लवटे, शिक्षिका नीलम वाघे, लिपिक रमेश सुर्वे, शिपाई चंद्रशेखर लिंगायत, विकास कदम, कोळवली प्राथमिक आरोग्य केंद्राच्या वैद्यकीय अधिकारी डॉ. प्रणाली जाधव, आरोग्य सहाय्यक नथुराम जानवळकर तसेच अन्य मान्यवर उपस्थित होते.
कार्यक्रमाच्या शेवटी विद्यार्थिनी, शिक्षक व उपस्थित मान्यवरांनी डॉ. घनश्याम जांगीड यांना वाढदिवसाच्या शुभेच्छा देत त्यांच्या सामाजिक बांधिलकीच्या उपक्रमाचे कौतुक केले.
