खेड – खेड तालुक्यातील लोटे परशुराम औद्योगिक परिसरात रासायनिक प्रक्रियेतून तयार झालेल्या गरम मातीमुळे महिलेचा मृत्यू झाला. या गंभीर प्रकरणात पोलिसांनी सदोष मनुष्यवधाचा गुन्हा दाखल केला आहे. व याप्रकरणी व्यवस्थापनातील दोन अधिकाऱ्यांना अटक करण्यात आली असून, पुढील तपास खेड पोलिस करत आहेत.
२२ मार्च रोजी दुपारी लोटे परशुराम एमआयडीसी परिसरातील पुष्कर कंपनीच्या आवारात रासायनिक प्रक्रियेतून तयार झालेल्या गरम मातीमुळे एका महिलेचा मृत्यू झाला. याबाबत ललिता चंद्रकांत सोनवणे यांनी फिर्याद दिली आहे. त्या मृत शंकुतला बबन सोनवणे (वय ४८) त्यांच्या चुलत सासू होत. याप्रकरणी कंपनीचे मालक गौतम मखारिया, सेफ्टी मॅनेजर सुधाकर जगताप, एचआर मॅनेजर सचिन मनवळ, कमर्शियल मॅनेजर रवींद्रकुमार भुतिया तसेच इतर संबंधित व्यवस्थापकांविरुद्ध गुन्हा दाखल करण्यात आला आहे. या प्रकरणी अखेर सचिन मनवळ (वय ४३, रा. भरणे बाईतवाडी) व रवींद्रकुमार भुतिया (वय ५३, रा. चिपळूण) यांना अटक करण्यात आली असुन खेड पोलीस अधिक तपास करत असले तरी कंपनीमालकाला गजाआड करण्यात पोलिसांना अद्याप अपयश आल्याने संताप व्यक्त होत आहे.
