खेड – खेड तालुक्यातील लोटे MIDC परिसरात ‘PFAS’ या कथित घातक रसायनाच्या उत्पादनावरून निर्माण झालेला वाद आता टोकाला पोहोचला असून, आज हा संघर्ष रस्त्यावर उतरणार आहे. ‘लक्ष्मी ऑरगॅनिक’ कंपनीविरोधात सोमवार, ६ एप्रिल रोजी सकाळी १०.३० वाजता भव्य मोर्चा काढण्यात येणार असून, परिसरात तणावपूर्ण वातावरण निर्माण झाले आहे.
गेल्या ७७ दिवसांपासून कंपनीच्या गेटसमोर सुरू असलेल्या धरणे आंदोलनानंतर आता आंदोलनकर्त्यांनी आक्रमक भूमिका घेत थेट मोर्चा काढण्याचा निर्णय घेतला आहे. स्थानिक नागरिक, पर्यावरणप्रेमी, मच्छिमार आणि विविध सामाजिक संघटना मोठ्या संख्येने या आंदोलनात सहभागी होणार आहेत.
आंदोलनकर्त्यांचा आरोप आहे की, ‘PFAS’ हे रसायन पर्यावरणासाठी अत्यंत घातक असून, यामुळे जलस्रोत, शेती, मच्छिमारी आणि नागरिकांच्या आरोग्यावर गंभीर परिणाम होऊ शकतात. परदेशात अशा प्रकल्पांवर बंदी घालण्यात आल्याचा दावा करत हा प्रकल्प तात्काळ बंद करण्याची मागणी केली जात आहे.
या बाबत ‘लक्ष्मी ऑरगॅनिक’ कंपनीने सर्व आरोप फेटाळून लावत उत्पादन प्रक्रियेत नियमांचे पूर्ण पालन होत असल्याचा दावा केला आहे. मात्र, कंपनीच्या या स्पष्टीकरणावर स्थानिकांनी समाधान न मानता आंदोलन अधिक तीव्र केले आहे.
: या आंदोलनाला आता राजकीय पाठबळही मिळू लागले आहे. मनसे अध्यक्ष राज ठाकरे यांनी आंदोलनाला उघड पाठिंबा दर्शवला असून, गरज पडल्यास मनसे आंदोलनकर्त्यांच्या पाठीशी उभी राहील, असे आश्वासन दिले आहे. तसेच नितीन सरदेसाई यांनीही हा लढा जनतेच्या हक्काचा असल्याचे स्पष्ट करत पूर्ण पाठबळ जाहीर केले आहे. आजच्या मोर्चासाठी कोकणासह राज्यभरातून मोठ्या संख्येने नागरिक सहभागी होण्याची शक्यता असून प्रशासन सतर्क झाले आहे.
