कोल्हापूर – महाराष्ट्र राज्य सहकारी पतसंस्था फेडरेशन मर्या. आयोजित सहकारी पतसंस्थांचा महिला मेळावा कोल्हापूर येथे अनेक मान्यवरांच्या उपस्थितीत मोठ्या उत्साहात झाला. यावेळी सहकारी पतसंस्था चळवळीत उल्लेखनीय कार्य केल्याबद्दल चिपळूण नागरी सहकारी पतसंस्थेच्या मुख्य कार्यकारी अधिकारी स्वप्ना प्रशांत यादव यांचा बेस्ट सीईओ पुरस्काराने मान्यवरांच्या हस्ते गौरव करण्यात आला.
महाराष्ट्र राज्य सहकारी पतसंस्था फेडरेशनच्या वतीने दरवर्षी सहकारी क्षेत्रातील कामकाजात ठसा उमटविलेल्या राज्यभरातील कर्तबगार महिलांचा पुरस्कार देऊन सन्मान केला जातो. या फेडरेशनतर्फे दिला जाणारा बेस्ट सीईओ पुरस्कार यंदा स्वप्ना यादव यांना जाहीर करण्यात आला. कोल्हापूर येथील आनंद भवन, सायबर कॉलेज येथे अनेक मान्यवरांच्या उपस्थितीत हा पुरस्कार वितरण सोहळा आयोजित करण्यात आला होता. या सोहळ्याचे उद्घाटन सकाळी कोल्हापूरचे खासदार धनंजयराव महाडिक यांच्या हस्ते झाले. तर पुरस्कार वितरण समारंभाच्या समारोपाला महाराष्ट्र राज्याचे आरोग्यमंत्री ना. प्रकाश अबिटकर उपस्थित होते. तसेच या पुरस्कार वितरण सोहळ्याला कोल्हापूरच्या महापौर रुपाराणी निकम, गोदावरी अर्बन मल्टीस्टेटच्या राजश्रीताई पाटील, भागिरथी महिला पतसंस्थेच्या चेअरमन अरुंधती महाडिक आदी उपस्थित होते. महाराष्ट्र राज्य सहकारी पतसंस्था फेडरेशनचे अध्यक्ष ओमप्रकाश दादाप्पा तथा काका कोयटे, मुख्य कार्यकारी अधिकारी सुरेखा लवांडे, सहसचिव भारती मुथ्था, संचालिका निलिमा बावणे, ॲड्. अंजली पाटील यांच्यासह विविध क्षेत्रातील मान्यवर मोठ्या संख्येने उपस्थित होते. सौ. स्वप्ना यादव यांना मिळालेल्या पुरस्काराबद्दल विविध स्तरावरून त्यांच्यावर अभिनंदनाचा वर्षाव होत आहे.
