चिपळूण – चिपळूण पंचायत समितीच्या शिक्षण विभाग कार्यालयावर तब्बल दोन वर्षांचे वीजबिल थकल्याने महावितरणने थेट वीज कनेक्शन तोडण्याची कारवाई केल्याची धक्कादायक घटना समोर आली आहे. सुमारे ९५ हजार रुपयांची थकबाकी असल्यामुळे सोमवारी दुपारी ही कारवाई करण्यात आली. परिणामी गेल्या दोन दिवसांपासून संपूर्ण कार्यालय अंधारातच कामकाज करत असून, प्रशासनाची मोठी नामुष्की झाली आहे.
पंचायत समितीच्या शिक्षण विभाग
कार्यालयाचे वीजबिल शासनाकडून मिळणाऱ्या अनुदानातून भरले जाते. मात्र गेल्या दोन वर्षांपासून आवश्यक अनुदान प्राप्त झाले नसल्याने वीजबिल भरण्यासाठी निधी उपलब्ध झाला नाही. यामुळे थकबाकीची रक्कम वाढत गेली आणि अखेर महावितरणने कडक भूमिका घेत वीजपुरवठा खंडित केला. दरम्यान, मार्चअखेरच्या कामांचा ताण वाढलेला असताना वीज नसल्यामुळे कार्यालयीन कामकाज अक्षरशः ठप्प झाले आहे. संगणकीय कामे बंद पडली असून, कर्मचारी कडाक्याच्या उन्हात घामाघूम होत काम करत आहेत. यामुळे कार्यालयात येणाऱ्या नागरिकांचीही मोठी गैरसोय होत आहे. या प्रकारामुळे शिक्षण विभागाच्या कारभारावर प्रश्नचिन्ह निर्माण झाले असून, संबंधित प्रशासनाच्या नियोजनशून्यतेवरही टीका होत आहे. तातडीने निधी उपलब्ध करून वीजपुरवठा पूर्ववत सुरू करावा, अशी मागणी स्थानिकांकडून करण्यात येत आहे. तसेच प्रशासनाने या प्रकरणाची गांभीर्याने दखल घेऊन लवकरात लवकर तोडगा काढावा, अशी अपेक्षा व्यक्त होत आहे.
