गुहागर – गुहागर पंचायत समिती सभापतीपदी सेनेकडून प्रणव पोळेकर यांची तर उपसभापतीपदी भाजपकडून निलेश सुर्वे यांची बिनविरोध निवड करण्यात आली.
गुहागर पंचायत समिती निवडणुकीत भाजप-शिवसेना युतीची सत्ता आल्यानंतर याठिकाणी सभापती व उपसभापती म्हणून कोणाची निवड होणार अशी चर्चा सुरू होती. याठिकाणी शिवसेनेने निवडणूक लढविलेल्या 6 जागांपैकी 5 जागांवर विजय मिळवला होता तर भाजपने ४ पैकी ४ जागांवर विजय मिळवला. यामुळे याठिकाणी शिवसेनेचा सभापती व उपसभापती भाजपचा विराजमान असणार हे नक्की होते. मात्र, कोणाच्या गळ्यात ही माळ पडणार याबाबत अनेक तर्क वितर्क लढवले जात होते. अखेर सभापतीपदी शिवसेनेकडून पालकमंत्री उदय सामंत यांचे निकटवर्तीय प्रणव पोळेकर यांच्या नावाची अधिकृत घोषणा करण्यात आली.तर उपसभापतीपदी भाजपकडून माजी आम. डॉ. विनय नातू यांचे विश्वासू सहकारी निलेश सुर्वे यांच्या नावाची अधिकृत घोषणा करण्यात आली. यावेळी माजी आम. डॉ. विनय नातू, नवनियुक्त पंचायत समिती सदस्य तसेच शिवसेना-भाजपचे पदाधिकारी व कार्यकर्ते मोठ्या संख्येने उपस्थित होते. यावेळी निवडणूक निर्णय अधिकारी म्हणून गुहागरचे तहसीलदार परीक्षित पाटील होते.
