गुहागर – गुहागर चिपळूण या राष्ट्रीय महामार्गाचे ज्या ठिकाणी खड्डे पडले होते. त्या ठिकाणी नुकतेच डांबरीकरण करण्यात आले. मात्र डांबरीकरण करून 24 तास झाले नाही तोपर्यंतच या रस्त्याला जेसीबी लावून खोदकाम करून त्या ठिकाणी रस्त्यावर माती टाकली असल्याचे निदर्शनास आले. त्यामुळे हे कृत्य नक्की कोणी केले? का केले? याची चर्चा मात्र संपूर्ण गुहागर परिसरात सुरू आहे.
गुहागर- चिपळूण या राष्ट्रीय महामार्गावरील मोडकाआगर परिसरात ही घटना घडली आहे. काल या ठिकाणी रस्त्यावर नॅशनल हायवेच्या अधिकाऱ्यांनी डांबरीकरण करून रस्ता गुळगुळीत केला होता. मात्र आज सकाळी या रस्त्यावरून गाड्या जाऊ लागल्या त्या वेळेला असे निदर्शनास आले की हा रस्त्यामध्ये खोदकाम करून रस्ता पुन्हा उखरलाय. जर एका रात्रीत अशाप्रकारे नॅशनल हायवे वर खोदकाम केले जात असेल तर त्याला जबाबदार कोण..? हा रस्ता खोदण्याआधी संबंधित आणि जे काही काम केले त्याची परवानगी नॅशनल हायवेच्या अधिकाऱ्यांकडून घेतली होती का..? जर हा रस्ता खोदायचा होताच तर रस्त्याचे डांबरीकरण करण्याआधी जे काही काम करायचं होतं ते का केलं गेलं नाही..? की जाणून-बुजून नव्याने बनवण्यात आलेला हा रस्ता खोदण्यात आला आहे याची चर्चा सध्या संपूर्ण गुहागर तालुक्यात सुरू आहे. 24 तासाच्या आत हा रस्ता ज्यांनी कुणी खोदकाम केलाय त्याच्यावर कारवाई करावी अशी मागणी आता येथील ग्रामस्थ करत आहेत.
