सातारा ( प्रवीण गाडे ) – सातारा जिल्ह्याला हादरवून सोडणारी एक मोठी कारवाई स्थानिक गुन्हे शाखेने (LCB) केली आहे. लोणंद बसस्थानक परिसरात भरदिवसा सापळा रचून पोलिसांनी शस्त्र तस्करीचा मोठा डाव उधळून लावला. फिल्मी स्टाईलने केलेल्या या कारवाईत ५ सराईत गुन्हेगारांना बेड्या ठोकण्यात आल्या असून, त्यांच्याकडून तब्बल १२ लाख ६७ हजार ५०० रुपयांचा मुद्देमाल जप्त करण्यात आला आहे.
लोणंदच्या गजबजलेल्या बसस्थानक परिसरात काही तरुण शस्त्र विक्रीसाठी येणार असल्याची पक्की खबर पोलीस निरीक्षक अरुण देवकर यांना मिळाली होती. त्यानुसार सहाय्यक पोलीस निरीक्षक रमेश गर्जे व रोहित फार्णे यांच्या पथकाने साध्या वेशात परिसरात फिल्डिंग लावली. जशी संशयास्पद मारुती सुझुकी एर्टिगा कार दाखल झाली, तसा पोलिसांनी घेराव घातला. पळून जाण्याच्या प्रयत्नात असलेल्या पाचही जणांना पोलिसांनी झडप घालून जागीच दबोचले.
आरोपींच्या झडतीमध्ये पोलिसांना जे सापडले ते पाहून अधिकारीही चक्रावले. त्यांच्याकडून ३ घातक देशी बनावटीची पिस्तुलं, ५ जिवंत काडतुसे, ६ महागडे मोबाईल हँडसेट आणि पांढऱ्या रंगाची एर्टिगा कार असा मुद्देमाल हस्तगत करण्यात आला आहे. अटक करण्यात आलेले सलोणंदमध्ये शस्त्र तस्करांच्या मुसक्या आवळल्या!र्व आरोपी वाई तालुक्यातील असून त्यांचे वय २० ते ३४ दरम्यान आहे. निखिल मोरे (गंगापुरी, वाई), आयुष अडसुळ (रविवार पेठ, वाई), यश चव्हाण (बावधन), नितीन वाडकर (बावधन) आणि सनी भोसले (खानापूर) अशी पोलिसांनी ताब्यात घेतलेल्यांची नावे आहेत.
पोलीस अधीक्षक तुषार दोषी आणि अपर पोलीस अधीक्षक डॉ. वैशाली कडुकर यांच्या मार्गदर्शनाखाली ही मोहीम राबवण्यात आली. जिल्ह्यात अवैध शस्त्रांचा सुळसुळाट होऊ देणार नाही, असा इशाराच जणू या कारवाईतून देण्यात आला आहे. लोणंद पोलीस ठाण्यात शस्त्र अधिनियमांतर्गत गुन्हा दाखल झाला असून, या शस्त्रांचा पुरवठा नक्की कोणाला होणार होता, याचा तपास आता पोलीस करत आहेत.
