गुहागर – गुहागर तालुक्यातील पवारसाखरी गावाचे सुपुत्र, ज्येष्ठ नाट्य व सिने अभिनेते, दिग्दर्शक आणि निर्माते . प्रमोद ज्ञानदेवराव पवार यांच्या प्रदीर्घ आणि उल्लेखनीय कलाप्रवासाला राष्ट्रीय स्तरावर मानाची पावती मिळाली आहे. १३ ऑगस्ट २०२६ रोजी नवी दिल्ली येथे राष्ट्रपतींच्या हस्ते त्यांना प्रतिष्ठेचा ‘संगीत नाटक अकादमी पुरस्कार’ प्रदान करण्यात आला.
मराठी रंगभूमी आणि चित्रपटसृष्टीमध्ये अभिनेता, दिग्दर्शक आणि निर्माता म्हणून आपल्या बहुआयामी प्रतिभेचा ठसा उमटविणाऱ्या प्रमोद पवार यांच्या कर्तृत्वाचा हा राष्ट्रीय गौरव मानला जात आहे. आपल्या अभिनयातून, दिग्दर्शनातून आणि निर्मितीतून त्यांनी मराठी कलाक्षेत्राला समृद्ध करण्याचे महत्त्वपूर्ण कार्य केले आहे.
पवारसाखरीच्या मातीतून राष्ट्रीय रंगभूमीपर्यंतचा त्यांचा हा प्रवास गुहागर तालुक्यासह संपूर्ण रत्नागिरी जिल्ह्यासाठी अभिमानाचा क्षण ठरला आहे. त्यांच्या कलेतील सातत्य, प्रयोगशीलता आणि प्रदीर्घ योगदानाची दखल घेत मिळालेला हा पुरस्कार कोकणच्या सांस्कृतिक वैभवात मानाचा तुरा रोवणारा ठरला आहे.
गावच्या मातीतून उभा राहिलेला कलाकार देशाच्या सर्वोच्च सांस्कृतिक व्यासपीठावर सन्मानित होत असल्याने पवारसाखरी गावात तसेच गुहागर तालुक्यात आनंदाचे आणि अभिमानाचे वातावरण निर्माण झाले आहे.
प्रमोद पवार यांच्या या यशाबद्दल त्यांच्यावर अभिनंदनाचा वर्षाव होत असून, त्यांचा पुढील कलाप्रवास अधिक यशस्वी, समृद्ध आणि प्रेरणादायी ठरो, अशी भावना व्यक्त होत आहे. आई भवानी मातेच्या चरणी त्यांच्या उत्तरोत्तर प्रगतीसाठी प्रार्थना करण्यात येत आहे.
