गुहागर- गुहागर तालुक्यात अन्न व औषध प्रशासनाकडून खाद्य व्यवसायांची तपासणी आणि नियमांचे उल्लंघन करणाऱ्यांवर कारवाईची मोहीम सुरू आहे. शृंगारतळी येथे विनापरवाना सुरू असलेल्या चिकन सेंटरवर अन्न सुरक्षा अधिकारी परदेशी यांच्या पथकाने कारवाई करत दंड ठोठावला तसेच व्यवसाय बंद ठेवण्याची नोटीस बजावली. मात्र असे असले तरी नक्की कारवाई कुणावर झाली याबाबत सविस्तर माहिती न सांगितल्याने सध्या हा विषय चर्चेचा बनला आहे.
गुहागर चौपाटी परिसरातील स्नॅक्स सेंटर, विविध खाद्यपदार्थ विक्रेते तसेच शहरातील एका हॉटेलचीही अन्न सुरक्षा निकषांनुसार तपासणी करण्यात आली. व्यावसायिकांना स्वच्छता आणि अन्न सुरक्षेच्या नियमांचे पालन करण्याबाबत मार्गदर्शन करण्यात आले.
मात्र, अन्न प्रशासनाकडून अशा प्रकारच्या तपासण्या आणि कारवाया यापूर्वीही होत आल्या आहेत. कारवाई झाल्याचे सांगितले जाते; मात्र नेमक्या कोणत्या दुकानावर किंवा कोणत्या व्यावसायिकावर कारवाई करण्यात आली, याची नावे अनेकदा सार्वजनिक केली जात नसल्याने नागरिकांमध्ये प्रश्नचिन्ह निर्माण होत आहे.
कारवाई झालेल्या व्यवसायांची नावे, कारवाईचे स्वरूप, दंडाची रक्कम आणि संबंधित व्यवसायाकडे परवाना होता की नव्हता, याबाबत स्पष्ट माहिती सार्वजनिक केल्यास प्रशासनाच्या कारवाईबाबत अधिक पारदर्शकता निर्माण होऊ शकते, अशी नागरिकांमध्ये चर्चा आहे.
दरम्यान, तालुक्यातील इतर खाद्यपदार्थ विक्रेते, हॉटेल्स आणि खाद्य व्यवसायांचीही टप्प्याटप्प्याने तपासणी केली जाणार असल्याचे अन्न सुरक्षा अधिकारी परदेशी यांनी सांगितले आहे. त्यामुळे परवाना व नोंदणी नसलेल्या व्यावसायिकांनी तातडीने आवश्यक प्रक्रिया पूर्ण करण्याचे आवाहन करण्यात आले आहे. कारवाई होतेय, हे स्वागतार्ह; मात्र कारवाई नेमकी कोणावर झाली, याची अधिकृत माहितीही नागरिकांसमोर यावी, अशी अपेक्षा व्यक्त होत आहे.
