चिपळूण : सावर्डे येथे फ्लॅट बुकिंगच्या व्यवहारात मोठी फसवणूक झाल्याची घटना उघडकीस आली आहे. तब्बल दोन वर्षे उलटूनही फ्लॅटचा ताबा न मिळाल्याने दिगंबर शंकर सावर्डेकर (रा. अंधेरी-मुंबई) यांनी सावर्डे पोलिस ठाण्यात फिर्याद दिली आहे.
पोलिसांनी दिलेल्या माहितीनुसार, संशयित दीपक सखाराम सावर्डेकर (रा. सावर्डे) याने फिर्यादीकडून दोन फ्लॅट बुक करण्यासाठी ४९ लाख ५० हजार रुपये घेतले. हा व्यवहार २०२३ ते २०२५ दरम्यान झाला. मात्र, कोणतीही कागदपत्रे न करता संशयिताने पैसे स्वीकारले आणि ठरलेल्या मुदतीत फ्लॅटचा ताबा दिला नाही.यामध्ये एकूण २१ लाख रुपयांची फसवणूक झाल्याचे तक्रारीत नमूद करण्यात आले आहे. या प्रकरणी सावर्डे पोलिसांनी संशयिताविरोधात फसवणुकीचा गुन्हा दाखल करून तपास सुरू केला आहे.
