गुहागर – गुहागर तालुका प्रेस क्लब गुहागर या संस्थेतर्फे प्रति वर्षानुसार यंदाही गुरुवार ६ जानेवारी २०२२ रोजी पत्रकार दिन समारंभ पाटपन्हाळे ग्रामपंचायतमधील श्री शिवछत्रपती सभागृहात दुपारी ३ वाजता संपन्न होणार आहे.
गुहागर तालुका प्रेस क्लब गुहागर या संस्थेतर्फे पत्रकार दिन समारंभात मान्यवर स्वागत , उल्लेखनीय गौरवणीय व सामाजिक कार्याबद्दल पुरस्कार प्रदान सोहळा, विशेष गौरव समारंभ ,पत्रकारांचा सन्मान कार्यक्रम व पत्रकारितेचे मार्गदर्शन असे विविध कार्यक्रम संपन्न होणार आहेत.
गुहागर तालुका प्रेस क्लब गुहागर या संस्थेतर्फे संपन्न होणाऱ्या पत्रकार दिन समारंभात गुहागर तालुक्यातील शृंगारतळीमधील नामवंत उद्योजक व सामाजिक कार्यकर्ते नासिम अब्दुलसत्तार मालाणी यांच्या सामाजिक मदत कार्याच्या मौलिक योगदानामुळे सन्मानचिन्ह ,गौरवपत्र ,शाल व पुष्पगुच्छ प्रदान करून “गुहागर गौरव”पुरस्काराने सन्मानित करण्यात येणार आहे. तसेच सामाजिक कार्यकर्ते, रक्तदानाच्या श्रेष्ठ व गौरवदायी कार्यामध्ये अग्रेसर असणारे आबलोलीमधील विद्याधर उर्फ आप्पा राजाराम कदम यांना सन्मानचिन्ह ,गौरवपत्र ,शाल व पुष्पगुच्छ प्रदान करून “जीवनदाता “पुरस्काराने गौरविण्यात येणार आहे.
शृंगारतळीमधील नामवंत उद्योजक ,सामाजिक कार्यकर्ते व तरुण भारत २०२१ सन्मान संपादन केलेले गुलामभाई तांडेल तसेच सामाजिक कार्यात अग्रेसर असणारे व मदतीचे सहकार्य करणारे व शृंगारतळीमधील सामाजिक कार्यकर्ते अरुण गांधी तसेच सामाजिक कार्यात अग्रेसर असणाऱ्या सखी व स्वयंसिद्धा पुरस्कार संपादन केलेल्या महिला सुरक्षा संघटना महाराष्ट्र या संस्थेच्या गुहागर तालुकाध्यक्षा व वात्सल्य समितीच्या गुहागर तालुका सदस्य म्हणून कार्यरत असणाऱ्या सौ.पारिजात पराग कांबळे, सामर्थ्य सेवा संस्थेतर्फे विविध उपक्रम व कार्यक्रम राबवून सामाजिक सेवाव्रत करणाऱ्या निगुंडळच्या सौ. प्रज्ञा धामणस्कर – ताम्हणकर व न्यू इंग्लिश स्कूल व कनिष्ठ महाविद्यालय पाटपन्हाळे या विद्यालयातील विद्यार्थिनी कु. समृद्धी सुरेश आंबेकर हिने मार्गताम्हाणे एज्युकेशन सोसायटीतर्फे भारतीय स्वातंत्र्याच्या अमृतमहोत्सवानिमित्त “उत्सव स्वातंत्र्याचा गौरव स्वातंत्र्यवीरांचा” या उपक्रमांतर्गत संपन्न झालेल्या निबंध स्पर्धेत प्राथमिक गटात प्रथम क्रमांक संपादन केल्याबद्दल व शालेय व विविध आयोजित निबंध, वक्तृत्व, चित्रकला, कथाकथन, चित्रकला आदी स्पर्धांमध्ये सुयश संपादन केल्याबद्दल सन्मान चिन्ह, गौरवपत्र , शाल ,पुष्पगुच्छ प्रदान करून विशेष गौरविण्यात येणार आहे.
कोरोना ( कोव्हिड – १९) या जागतिक समस्या काळात विविध उपक्रम व कार्यक्रम राबवून सामाजिक कार्य केल्याबद्दल व संघटनेच्या माध्यमातून विविध कार्यक्रम व उपक्रमांनी समाज जागृती व सामाजिक काम केल्याबद्दल गुहागर तालुका सरपंच संघटनेचा गौरवपत्र व पुष्पगुच्छ प्रदान करून गौरव करण्यात येणार आहे. तसेच गुहागर तालुका प्रेस क्लब गुहागर या संस्थेचे पदाधिकारी असणारे पत्रकार व पत्रकार मित्र यांनी पुरस्कार संपादन केल्याबद्दल विशेष सन्मान करण्यात येणार आहे. तसेच गुहागर तालुका प्रेस क्लब गुहागर या संस्थेचे पदाधिकारी व सदस्य असणाऱ्या पत्रकारांचा मान्यवरांच्या हस्ते भेटवस्तू व पुष्पगुच्छ प्रदान करून सन्मान करण्यात येणार आहे. सदरच्या समारंभात पत्रकारितेचे मार्गदर्शन, मान्यवरांचे व सन्मानितांचे मनोगत असे कार्यक्रम संपन्न होणार आहेत.सदर आयोजित कार्यक्रमासाठी निमंत्रित मान्यवरांनी उपस्थित राहून सहकार्य करावे असे आवाहन अध्यक्ष दिनेश चव्हाण व पदाधिकारी यांनी केले आहे.
सदरच्या आयोजित पत्रकार दिन समारंभासाठी गुहागरच्या तहसीलदार श्रीमती प्रतिभा वराळे, गुहागरचे पोलीस निरीक्षक बी.के जाधव ,गटविकास अधिकारी श्री.भोसले ,पाटपन्हाळे ग्रामपंचायतीचे सरपंच संजय पवार , गुहागर तालुका प्रेस क्लब गुहागरचे अध्यक्ष दिनेश चव्हाण आदी मान्यवर उपस्थित राहणार आहेत.
