रत्नागिरी -आंतराष्ट्रीय बाजारात लाखो रुपये किंमत असणारे खवल्या मांजर व एक मांडुळ जातीचा साप यांची तस्करी करणाऱ्या ८ जणांच्या सापळा रचून मुसक्या आवळण्यात रत्नागिरी शहर पोलिसांना यश आलंय.
आज दुपारी अडीचच्या सुमारास रत्नागिरी शहर पोलीस ठाण्याचे पोलीस निरीक्षक अनिल लाड यांना गुप्त बातमीदारामार्फत माहीती मिळाली की, काही इसम हे खवले मांजर व मांडुळ जातीच्या सापाच्या तस्करी, विक्री करीता काजरघाटी परिसरात येणार आहेत. याबरोबर पोलीस यंत्रणा यंत्रणा अलर्ट झाली. अपर पोलीस अधिक्षक श्री. विशाल गायकवाड यांच्या पुर्व परवानगीने सदर इसमांना मुद्देमालासह पकडण्यासाठी विशाल गायकवाड, अपर पोलीस अधिक्षक, रत्नागिरी,गणेश इंगळे, उपविभागीय पोलीस अधिकारी, रत्नागिरी यांच्या मार्गदर्शनाखाली एक पथक तयार करण्यात आले.पोलिसांचे तयार करण्यात आलेले पथक काजरघाटी परिसरात सापळा रचून बसले असताना समोरून चार मोटार सायकल येताना दिसल्या. या मोटार सायकल वरून येणाऱ्या संशयित इसमांची पंचांसमक्ष तपासणी केली असता एमएच ०८ अयु ४१५१ या गाडीवर दोन इसम बसलेले होते . सदर गाडीच्या चालकाच्या फुटरेस्ट जवळ एका गोनपाटाच्या पिशवीत खवल्या मांजर हा वन्यजीव प्राणी असल्याचे तसेच गाडी क्र . एमएच ०८ ओएम ५७६८ चे मागे बसलेल्या इसमाचे मांडीवर एका प्लास्टीक पिशवीत एक मांडुळ जातीचा साप असल्याचे मिळून आले.
सापडलेले प्राणी हे दुर्मिळ असून अंतराष्ट्रीय बाजारात याची लाखो रुपये किंमत आहे. यातील एक जिवंत खवले मांजर त्याचे वजन १४ किलो व लांबी ४.९ फूट आहे तर एक जिवंत मांडुळ जातीचा साप, तपकिरी रंगाचा, त्यावर काळे ठिपके, त्याचे वजन ६०० ग्रॅम व लांबी २.६ फूट आहे.
वन्य प्राण्यांची तस्करी करीत असताना पोलिसांनी या आठ जणांना रंगेहात पकडून ताब्यात घेतले असून त्यांची नावे पुढीलप्रमाणे आहे. १) रंजीत सुरेंद्र सांवत, वय ३८ वर्षे, रा. घर नं.३४७ ९, झाडगाव नाका, ता. जि.रत्नागिरी २) सुनिल अनंत देवरुखकर, वय ३४ वर्षे रा. पोचरी, सोनारवाडी ता. संगमेश्वर जि.रत्नागिरी ३ ) ओमकार राजेश लिंगायत, वय २४ वर्षे रा गुरववाडी, खानु मठ ता. लांजा जि.रत्नागिरी ४) दिपक दिनकर इंगळे, वय २४ वर्षे रामु कणगवली पो वेरक ता. लांजा जि रत्नागिरी ५) संदेश रामचंद्र मालगुंडकर, वय ३९ व रा. पामापुर धारेवाडी, ता.संगमेश्वर जि.रत्नागिरी ६) दिनेश दत्ताराम मोन्डे, वय २९ वर्ष, रा. आढीवरे, कालीकावाडी, ता. राजापुर जि. रत्नागिरी साध्या रा. अक्षता अपार्टमेंट, रुम नंबर १६, कारवाचीवाडी, रत्नागिरी ७) प्रमोद वसंत कांबळे, वय ३९ वर्ष रा.कांबळेवाडी, कारवांचीवाडी ता. जि.रत्नागिरी ८ ) लक्ष्मण बबन नाडे , वय ४९ वर्षे रा. धामणी, ता. संगमेश्वर जि. रत्नागिरी असे असून अटक आरोपींविरोधात रत्नागिरी शहर पोलीस ठाणे येथे गु.र.क्र . २३०/२०२०, वन्यजीव संरक्षण अधिनियम १९७२ कलम ३९, ४४, ४८, ४८ अ, ५१ अन्वये गुन्हा दाखल करण्यात आला आहे.
