गुहागर – गुहागर शहरातील वरचापाट परिसरातील संदीप तुकाराम गिजे याच्यावर मंगेश काशिनाथ माटल याच्यावर धारदार कोयत्याने हल्ला केल्याप्रकरणी गुन्हा दाखल करण्यात आला होता. या प्रकरणात चिपळूण येथील जिल्हा सत्र न्यायालयाने संदीप गिजे याला ५० हजार रुपयांच्या जामीनावर मुक्त करण्याचे आदेश दिले आहेत. मिळालेल्या माहितीनुसार, ६ जुलै २०२६ रोजी दुपारी किर्तनवाडी येथे राहणाऱ्या मंगेश माटल यांच्या घरी संदीप गिजे गेला होता. कौटुंबिक वाद व संशयाच्या कारणातून दोघांमध्ये वाद झाल्याचे सांगण्यात येते. यावेळी संदीप गिजे याने मंगेश माटल यांच्या डोक्यावर धारदार कोयत्याने वार केल्याचा आरोप आहे. या घटनेत मंगेश माटल यांच्या कानामागील भागासह उजव्या खांद्याला दुखापत झाली होती. घटनेची माहिती मिळताच गुहागर पोलिसांनी संदीप गिजे याला ताब्यात घेत अटक केली. त्याच्याविरुद्ध खुनाचा प्रयत्न केल्याप्रकरणी गुन्हा दाखल करण्यात आला असून, त्याची न्यायालयीन कोठडीत रवानगी करण्यात आली होती. दरम्यान, आरोपीच्या जामिनासाठी ॲड. अलंकार विखारे यांनी चिपळूण जिल्हा सत्र न्यायालयात जामीन अर्ज दाखल केला. या अर्जाला तपास यंत्रणा तसेच सरकारी पक्षाकडून हरकत घेण्यात आली होती. आरोपीच्या वतीने युक्तिवाद करताना ॲड. अलंकार विखारे यांनी तपासाची बहुतांश प्रक्रिया पूर्ण झाल्याचे तसेच जखमी व्यक्तीला उपचारानंतर रुग्णालयातून डिस्चार्ज मिळाल्याचे न्यायालयाच्या निदर्शनास आणून दिले. उपलब्ध परिस्थितीच्या आधारे आरोपीला जामीन देण्याची मागणी त्यांनी केली.दोन्ही बाजूंचे म्हणणे ऐकून घेतल्यानंतर चिपळूण जिल्हा सत्र न्यायालयाने संदीप तुकाराम गिजे याला ५० हजार रुपयांच्या जामीन रकमेवर मुक्त करण्याचे आदेश दिले. या प्रकरणातील पुढील न्यायालयीन प्रक्रिया सुरू राहणार आहे.
