चिपळूण – बदलत्या तंत्रज्ञानाच्या युगात शिक्षण क्षेत्रात कृत्रिम बुद्धिमत्तेचा (AI) प्रभावी वापर कसा करता येईल, याचा प्रत्यक्ष अनुभव देणारी महत्त्वपूर्ण कार्यशाळा येथील नवकोंकण एज्युकेशन सोसायटीच्या डी.बी.जे. (स्वायत्त) महाविद्यालयात उत्साहात पार पडली. पद्मश्री डॉ. एस. आर. रंगनाथन यांच्या १३४ व्या जयंतीनिमित्त महाविद्यालयाच्या ग्रंथालय विभाग आणि स्टाफ अकॅडमीच्या संयुक्त विद्यमाने ‘अकॅडेमिक कार्यातील एआयचा वापर : शिक्षकांसाठी उपयुक्त आणि प्रात्यक्षिक अनुप्रयोग’ या विषयावर या कार्यशाळेचे आयोजन करण्यात आले होते.
कार्यशाळेत विविध विभागांतील प्राध्यापकांनी मोठ्या संख्येने सहभाग घेत एआयच्या आधुनिक साधनांचा प्रत्यक्ष वापर करून त्याचा शैक्षणिक क्षेत्रातील उपयोग समजून घेतला. त्यामुळे हे सत्र केवळ मार्गदर्शनापुरते मर्यादित न राहता प्रात्यक्षिक आणि कृतीआधारित ठरले.
एआयच्या साधनांचा प्रत्यक्ष वापर
कार्यशाळेत फ्लाइट एज्युकेशनल अँड चॅरिटेबल ट्रस्टचे संस्थापक तसेच युनिटेक कॉम्प्युटर एज्युकेशन सेंटरचे संचालक प्रा. जहूर बोट आणि सौ. पल्लवी ताठरे यांनी प्राध्यापकांना कृत्रिम बुद्धिमत्तेवर आधारित विविध साधनांची माहिती दिली. अध्यापन, शैक्षणिक साहित्य निर्मिती, माहिती संकलन आणि दैनंदिन शैक्षणिक कामकाजात एआयचा प्रभावी व उपयुक्त वापर कसा करता येईल, याचे प्रात्यक्षिकांसह मार्गदर्शन करण्यात आले. विशेष म्हणजे, उपस्थित प्राध्यापकांनी स्वतः विविध एआय साधनांचा वापर करून त्यांचा अनुभव घेतला. त्यामुळे कार्यशाळेदरम्यान प्राध्यापकांचा उत्स्फूर्त व सक्रिय सहभाग पाहायला मिळाला.
माजी विद्यार्थ्याचा महाविद्यालयातच सन्मानाचा क्षण
या कार्यशाळेचे आणखी एक वैशिष्ट्य म्हणजे प्रा. जहूर बोट हे डी.बी.जे. महाविद्यालयाचे माजी विद्यार्थी आहेत. ज्या महाविद्यालयात त्यांनी विद्यार्थी म्हणून शिक्षण घेतले, त्याच महाविद्यालयात आज रिसोर्स पर्सन म्हणून प्राध्यापकांना मार्गदर्शन करण्याची संधी मिळाल्याने हा क्षण विशेष संस्मरणीय ठरला.कार्यक्रमाला महाविद्यालयाचे प्राचार्य डॉ. बापट, उपप्राचार्य आठवले खवणेकर कुलकर्णी , ग्रंथपाल डॉ. एस. पी. मोरे यांच्यासह इतर मान्यवर उपस्थित होते.
समारोपावेळी डॉ. शिंदे आणि प्रा. बामणे यांनी मनोगत व्यक्त करत कार्यशाळेचे कौतुक केले. वाघ यांनी आभार प्रदर्शन केले. कोकणातील शैक्षणिक क्षेत्रात एआय साक्षरतेचा प्रसार करण्याच्या दृष्टीने युनिटेक कॉम्प्युटर एज्युकेशन सेंटरच्या माध्यमातून सुरू असलेल्या प्रयत्नांना या कार्यशाळेमुळे आणखी बळ मिळाले आहे. शिक्षण क्षेत्रातील बदलत्या तंत्रज्ञानाशी प्राध्यापकांना जोडणारा हा उपक्रम महत्त्वपूर्ण ठरला.
