चिपळूण – सहकार क्षेत्रात उल्लेखनीय कार्य करून आपल्या कामाचा ठसा उमटविणाऱ्या चिपळूण नागरी सहकारी पतसंस्थेच्या मुख्य कार्यकारी अधिकारी स्वप्ना यादव यांना त्यांच्या भरीव योगदानाबद्दल राज्यस्तरीय ‘राजर्षी छत्रपती शाहू महाराज पुरस्कार’ देऊन गौरविण्यात आले. शिवसेना नेते तथा आमदार भास्करराव जाधव यांच्या हस्ते हा सन्मान प्रदान करण्यात आला. चिपळूण शहरातील इंदिरा गांधी सांस्कृतिक केंद्रात हा पुरस्कार सोहळा उत्साहात पार पडला.
इंडियन स्टुडंट कौन्सिलतर्फे आयोजित या पुरस्कार सोहळ्यात स्वप्ना यादव यांना मानपत्र, स्मृतिचिन्ह, शाल आणि श्रीफळ देऊन गौरविण्यात आले. सहकार क्षेत्रात सातत्याने उल्लेखनीय काम करणाऱ्या व्यक्तीच्या कार्याची राज्यस्तरावर दखल घेतल्याने चिपळूणच्या सहकार क्षेत्रात या पुरस्काराची विशेष चर्चा होत आहे.
या सोहळ्याला आमदार शेखर निकम, भाजप दक्षिण रत्नागिरी जिल्हाध्यक्ष प्रशांत यादव, उद्योजक राजू जोशी, , संस्थेचे अध्यक्ष प्रा. ज्ञानोबा कदम यांच्यासह विविध क्षेत्रातील मान्यवर उपस्थित होते.
शाहू-आंबेडकर विचारांचा जागर
कार्यक्रमात केंद्रीय सामाजिक न्याय राज्यमंत्री रामदास आठवले यांनी राजर्षी छत्रपती शाहू महाराज आणि डॉ. बाबासाहेब आंबेडकर यांच्या जवळच्या संबंधांचा उल्लेख केला. कोल्हापूरमध्ये शाहू महाराजांनी बहुजन समाजासाठी आरक्षणाची सुविधा उपलब्ध करून दिली. त्यानंतर एससी-एसटी समाजाला आरक्षणाचा लाभ मिळाला, असे त्यांनी नमूद केले.
ज्या समाजघटकांचे उत्पन्न कमी आहे, अशा गरजू घटकांना आरक्षणाचा लाभ मिळाला पाहिजे, अशी भूमिका मांडताना आठवले यांनी “मात्र, अन्य कोणत्याही आरक्षणाला धक्का लागता कामा नये”, असे स्पष्ट केले.
राजर्षी छत्रपती शाहू महाराजांच्या कार्याचा गौरव करताना स्वप्ना यादव यांनी चिपळूण नागरी सहकारी पतसंस्थेच्या वाटचालीचाही उल्लेख केला. चिपळूण नागरी सहकारी पतसंस्थेची सुरुवात त्यांचे वडील सुभाष चव्हाण यांनी केली. गेल्या ३३ वर्षांच्या कालावधीत संस्थेने मोठी आर्थिक प्रगती साधली असून संस्थेची उलाढाल सुमारे २३०० कोटी रुपयांपर्यंत पोहोचली आहे, अशी माहिती त्यांनी दिली. तसेच संस्थेमार्फत सुमारे एक हजार कोटी रुपयांचा कर्जव्यवहार झाल्याचेही त्यांनी सांगितले. याशिवाय ‘वाशीची डेअरी’च्या माध्यमातून सुमारे १५ ते २० हजार शेतकऱ्यांना मदत मिळत असल्याचा उल्लेखही त्यांनी यावेळी केला. त्यामुळे सहकाराच्या माध्यमातून केवळ आर्थिक व्यवहार न करता शेतकरी आणि सामान्य नागरिकांपर्यंत विकासाचा लाभ पोहोचविण्याचा प्रयत्न सुरू असल्याचे चित्र यावेळी समोर आले.
पुरस्कार स्वीकारल्यानंतर स्वप्ना यादव यांनी राजर्षी छत्रपती शाहू महाराजांच्या कार्याचा गौरव करताना त्यांचे कार्य प्रत्येकासाठी आदर्शवत असल्याचे सांगितले. शाहू महाराजांनी समाजातील वंचित, मागास आणि गरजू घटकांसाठी केलेले कार्य आजही प्रेरणादायी असल्याचे त्यांनी नमूद केले. चिपळूणवरील आपले प्रेम आणि सहकार क्षेत्रातील काम यामुळे या पुरस्कार सोहळ्याला उपस्थित राहण्याचा आनंद असल्याचेही त्यांनी यावेळी सांगितले.
