गुहागर – गुहागर तालुक्यातील बुधल बीचवर दोन व्यक्तींचा बुडून दुर्दैवी मृत्यू झाल्याची हृदयद्रावक घटना समोर आली आहे. फिशिंग रॉडच्या सहाय्याने समुद्रात मासेमारी करण्यासाठी आलेल्या या दोघांचा समुद्राच्या लाटांमध्ये वाहून गेल्याने मृत्यू झाल्याचा प्राथमिक अंदाज व्यक्त केला जात आहे. या घटनेमुळे बुधलसह गुहागर आणि चिपळूण परिसरात हळहळ व्यक्त होत आहे.
प्राथमिक माहितीनुसार, मृत दोघेही चिपळूण तालुक्यातील गोवळकोट परिसरातील रहिवासी असल्याचे समजते. दोघे फिशिंग रॉड घेऊन बुधल बीचच्या खडकाळ भागात मासेमारी करण्यासाठी आले होते. समुद्राच्या लाटांचा अंदाज न आल्याने किंवा अचानक आलेल्या मोठ्या लाटेमुळे ते पाण्यात वाहून गेले असावेत, अशी शक्यता व्यक्त केली जात आहे. काही वेळाने बुधल बीच परिसरात दोन मृतदेह आढळून आल्याने एकच खळबळ उडाली. घटनेची माहिती मिळताच स्थानिक ग्रामस्थांनी तातडीने मदतीसाठी धाव घेतली.
घटनेची माहिती मिळताच गुहागरचे सभापती प्रणव पोळेकर यांनी कोणताही विलंब न करता अवघ्या काही मिनिटांत घटनास्थळी धाव घेतली. त्यांनी तत्काळ पोलिस प्रशासन तसेच संबंधित यंत्रणांशी संपर्क साधून घटनेची माहिती दिली आणि मदतकार्य सुरू करण्यासाठी प्रशासनाला घटनास्थळी पाचारण केले. दरम्यान, पोलिस प्रशासन घटनास्थळी दाखल झाले असून दोन्ही मृतदेह ताब्यात घेण्यात आले आहेत. पंचनामा तसेच मृतदेहांची ओळख पटविण्यासह पुढील कायदेशीर प्रक्रिया सुरू आहे.
