गुहागर – गुहागर तालुक्यातील जिल्हा परिषद मराठी शाळा तळवली नं. १ येथील एका शिक्षकाच्या मनमानी कारभाराबाबत स्थानिक ग्रामस्थांनी विचारणा केली असता या शिक्षकाने “अधिकारी माझ्या खिशात ‘आहेत. तुम्हाला काय करायचे करा असे उद्धटपणे सांगितल्याने या शिक्षकाबद्दल सर्वत्र संताप आणि नाराजी व्यक्त करण्यात येत आहे.
तळवली येथील जिल्हा परिषदेच्या शाळेवरील एकनाथ जावरे हे शिक्षक सातत्याने उशिरा शाळेत येणे, अध्यापनाकडे दुर्लक्ष करणे, पालक व ग्रामस्थांशी अरेरावीची भाषा वापरणे, तसेच “अधिकारी माझ्या खिशात आहेत”, ते माझ्या शाळेत यायला दहा वेळा विचार करतात, मी शृंगारतळीमध्ये राहतो, अशा प्रकारची उघड धमकी देण्याचे गंभीर प्रकार दिवसेंदिवस वाढत असल्याने त्यांच्या या वर्तनामुळे शाळेतील वातावरण बिघडून विद्यार्थ्यांच्या शिक्षणावर प्रतिकूल परिणाम होत असल्याचा आरोप येथील ग्रामस्थांनी केला आहे.
दिनांक ३० मार्च २०२६ रोजी पोषण आहार शिजविणाऱ्या महिलेशी संबंधित शिक्षकाने अत्यंत आक्रमक वर्तन करत मोठ्याने भांडण केले. यावेळी “माझ्या कुटुंबीयांनी मला उलट बोलले असते तर कोयत्याने कापून टाकले असते” असे धक्कादायक वक्तव्य विद्यार्थ्यांसमोर व ग्रामस्थांसमोर करण्यात आल्याने भीतीचे वातावरण निर्माण झाले. या घटनेनंतर झालेल्या शाळा व्यवस्थापन समितीच्या बैठकीतही संबंधित शिक्षकाने उद्धट वर्तन कायम ठेवत अधिकृत प्रोसिडिंग (नोंद) लिहिण्यास स्पष्ट नकार दिला. तसेच सहाय्यक शिक्षिकेलाही प्रोसिडिंग लिहू नये असा दबाव टाकल्याचा आरोप आहे. पालकांनी लेखी माफी मागण्याची मागणी केली असता, “तोंडी माफी मागितली आहे, लेखी कशाला?” असे म्हणत त्यांनी सरळ नकार दिला.
या सर्व प्रकारांमुळे संतप्त पालकांनी आपल्या मुलांना शाळेत न पाठवण्याचा निर्णय घेतला असून, याबाबत गटशिक्षण अधिकारी व पंचायत समिती प्रशासनाला लेखी निवेदन देण्यात आले आहे. त्यामुळे आता याबाबत प्रशासन काय भूमिका घेते याकडेच सर्व नागरिकांचे लक्ष लागून राहिले आहेत.
