गुहागर – दुकानात घरफोडी करण्याचा प्रयत्न करणाऱ्या चार आरोपींना स्थानिक गुन्हे अन्वेषण शाखेने ताब्यात घेतले असून त्यांच्याकडून सुमारे ११ लाख ९५ हजार रुपयांचा मुद्देमाल जप्त करण्यात आला आहे. मात्र न्यायालयात त्यांना हजर केले असता त्यांची जामीनावर सुटका करण्यात आली.
गुहागर येथील शृंगारतळी बाजारपेठेत असलेल्या ‘ओंकार ज्वेलर्स’ या दुकानात दिनांक १८ फेब्रुवारी रोजी रात्री सुमारे एक वाजण्याच्या सुमारास अज्ञात इसमांनी दुकानाचे बाहेरील कुलूप तोडून आत प्रवेश केला होता. त्यानंतर दुकानातील तिजोरी तोडण्याचा प्रयत्न करण्यात आला होता.या प्रकरणी गुहागर पोलीस ठाण्यात गुन्हा दाखल करण्यात आला होता. त्यानंतर या गुन्ह्याचा तपास स्थानिक गुन्हे अन्वेषण शाखेकडे देण्यात आला. तांत्रिक तपास, गुप्त माहिती आणि विशेष पथकाच्या कारवाईच्या आधारे पोलिसांनी चार संशयीत आरोपींना मुंबई येथून ताब्यात घेतले आहे. इरफान निशांत सुधीर आंबोकर (रा. बीएसटी कॉलनी, पंतनगर, घाटकोपर, मुंबई) मोईन शकील शेख (रा. गोपाल भवन, घाटकोपर, मुंबई) सुमित कल्पेश चव्हाण (रा. कोहिनूर सिटी, कुर्ला, मुंबई) आयुष चितेंद्र धाडगा (रा. तानसा पाइपलाईन, लक्ष्मण नगर, घाटकोपर, मुंबई) आरोपींकडून गुन्ह्यात वापरलेले एक चारचाकी वाहन तसेच इतर साहित्य असा एकूण ११,९५,२०० रुपये किमतीचा मुद्देमाल जप्त करण्यात आला आहे. या प्रकरणाचा पुढील तपास गुहागर पोलीस करीत आहेत. ही कारवाई जिल्हा पोलीस अधीक्षक नितीन दत्तात्रय बगाटे व अपर पोलीस अधीक्षक यांच्या मार्गदर्शनाखाली स्थानिक गुन्हे अन्वेषण शाखेच्या पथकाने केली.
आज आरोपींना कोर्टात हजर केले असता आरोपीच्या वतीने गुहागरचे वकील संकेत साळवी यांच्या मार्गदर्शनाखाली वकील अलंकार विखारे यांनी युक्तिवाद केला. या आरोपींना प्रत्येकी 15 हजार रुपयाच्या जामीनावर मुक्त करण्यात आले.त्यांना वकील सुप्रिया वाघदरे आणि वकील रोशनी पवार यांनी सहकार्य केले.
