गुहागर – रत्नागिरी जिल्ह्यातील इयत्ता ९वी ते १२वीच्या विद्यार्थ्यांसाठी प्रा. जहूर बोट यांच्या संकल्पनेतून MKCL मान्यताप्राप्त युनिटेक कॉम्प्युटर एज्युकेशन सेंटर, शृंगारतळी व रत्नागिरी जिल्हा मुख्याध्यापक संघ यांच्या संयुक्त विद्यमाने जिल्हास्तरीय आर्टिफिशियल इंटेलिजन्स (AI) व सायबर सिक्युरिटी जनजागृती परीक्षा ऑफलाइन पद्धतीने अत्यंत यशस्वीरीत्या पार पडली.
ही परीक्षा शिक्षणाधिकारी (माध्यमिक), जिल्हा परिषद रत्नागिरी यांच्या मान्यतेनुसार संपूर्ण जिल्ह्यात एकाच वेळी घेण्यात आली. या परीक्षेत जिल्ह्यातील २६१ शाळा व कनिष्ठ महाविद्यालयांनी सहभाग नोंदवला, तर ३७,४५६ विद्यार्थ्यांनी इयत्ता ९वी–१०वी व ११वी–१२वी अशा दोन मान्यताप्राप्त गटांमध्ये परीक्षेला उपस्थिती दर्शवली. संपूर्ण परीक्षा प्रक्रिया जिल्हाभर सुरळीत, शिस्तबद्ध व नियोजनबद्ध पद्धतीने पार पडली. या उपक्रमाच्या यशस्वी अंमलबजावणीसाठी रत्नागिरी जिल्हा मुख्याध्यापक संघाचे अध्यक्ष अय्युब मुल्ला, उपाध्यक्ष संजय चव्हाण सचिव महेश पाटकर व सर्व पदाधिकारी व तालुका कार्यकारिणी सदस्यांनी वेळोवेळी दिलेले मार्गदर्शन, समन्वय आणि सहकार्य अत्यंत मोलाचे ठरले. त्यांच्या सकारात्मक भूमिकेमुळे शाळा व कनिष्ठ महाविद्यालय स्तरावर परीक्षेचे प्रभावी नियोजन व अंमलबजावणी शक्य झाली. या भव्य शैक्षणिक उपक्रमामागे युनिटेक कॉम्प्युटर एज्युकेशन सेंटरचे व्यवस्थापकीय संचालक प्रा. जहूर बोट यांच्या मार्गदर्शनाखाली संपूर्ण युनिटेक टीमचे काटेकोर नियोजन, प्रभावी व्यवस्थापन व अथक परिश्रम महत्त्वाचे ठरले.
महाराष्ट्र ज्ञान महामंडळाचे व्यवस्थापकीय संचालक समीर पांडे यांनी युनिटेक कॉम्प्युटर एज्युकेशन सेंटर व संचालक प्रा. जहूर बोट यांचे विशेष कौतुक करत, AI व सायबर सिक्युरिटी क्षेत्रातील हा उपक्रम विद्यार्थ्यांसाठी दिशादर्शक असल्याचे नमूद करून पुढील वाटचालीस शुभेच्छा दिल्या.तसेच जिल्हा शिक्षणाधिकारी (माध्यमिक), जिल्हा परिषद रत्नागिरी मा. मेंगणे यांनीही या जिल्हास्तरीय उपक्रमाचे विशेष अभिनंदन करत, आधुनिक तंत्रज्ञानाविषयी विद्यार्थ्यांमध्ये जनजागृती निर्माण करणारा हा उपक्रम कौतुकास्पद असून भविष्यात अशा अधिक उपक्रमांची आवश्यकता असल्याचे मत व्यक्त केले.
