चिपळूण – चिपळूण नगरपरिषदेच्या निवडणुकीची प्रक्रिया सुरू असतानाच भारतीय जनता पक्षात मोठी राजकीय खळबळ उडाली आहे. भाजपचे जिल्हा उपाध्यक्ष व माजी नगरसेवक परिमल भोसले यांनी पक्षाच्या प्राथमिक सदस्यत्वासह जिल्हा उपाध्यक्ष पदाचा तडकाफडकी राजीनामा दिला आहे.
परिमल भोसले यांनी असंख्य कार्यकर्त्यांसह पक्षाचा राजीनामा दिला असून, या निर्णयामुळे नगरपरिषद निवडणुकीच्या तोंडावर भाजपच्या संघटनात अस्वस्थता निर्माण झाली आहे. भोसले उद्या (रविवारी) पत्रकार परिषद घेऊन अधिकृतरीत्या आपला राजीनामा जाहीर करणार आहेत. तसेच, राजीनाम्यामागची कारणे आणि पुढील राजकीय भूमिका याबाबतही ते पत्रकार परिषदेत भूमिका स्पष्ट करणार असल्याची माहिती मिळाली आहे. परिमल भोसले हे पक्षातील सक्रिय आणि प्रभावी नेतृत्व म्हणून ओळखले जात होते. त्यांच्या या निर्णयामुळे भाजपच्या नगरपरिषद निवडणुकीतील रणनीतीवर परिणाम होण्याची शक्यता वर्तवली जात आहे.चिपळूणच्या राजकारणात या घडामोडीमुळे भाजपमध्ये प्रचंड हालचाल व चर्चांना उधाण आले आहे.
