संगमेश्वर – संगमेश्वर रोड रेल्वे स्थानकावर महत्त्वाच्या चार साप्ताहिक एक्सप्रेस गाड्यांना थांबा मिळावा, यासाठी यंदाच्या गणेशोत्सवाच्या पार्श्वभूमीवर आगळीवेगळी मोहीम राबविण्यात आली. गणपती बाप्पांचे वाहन असलेल्या ‘उंदीरमामा’च्या माध्यमातून रेल्वे प्रशासनाचे लक्ष वेधत प्रवाशांच्या मागणीची नोंद स्टेशन मास्तरांच्या तक्रार वहीत करण्यात आली.
संगमेश्वर रोड येथे बांद्रा–मडगाव, श्री गंगानगर, अजमेर–एर्नाकुलम आणि जबलपूर–कोयंबतूर या चार साप्ताहिक एक्सप्रेसना थांबा मिळावा, अशी मागणी करण्यात आली आहे. गणेशोत्सवासाठी मुंबई, पुणे तसेच राज्याच्या विविध भागांतून मोठ्या संख्येने चाकरमानी कोकणात आले होते. उत्सवाची सांगता झाल्यानंतर परतीचा प्रवास सुरू झाल्याने संगमेश्वर रोड स्थानकावर प्रवाशांची मोठी वर्दळ आहे. या पार्श्वभूमीवर अधिक गाड्यांना थांबे उपलब्ध झाल्यास स्थानिक प्रवाशांना मोठा दिलासा मिळू शकतो, असा मुद्दा मांडण्यात आला.या चारही गाड्यांना संगमेश्वर रोड येथे थांबा मिळाल्यास संगमेश्वर तालुक्यासह आसपासच्या परिसरातील प्रवाशांना देशातील विविध भागांमध्ये जाण्यासाठी रेल्वेची अतिरिक्त सुविधा उपलब्ध होणार आहे. विशेषतः मुंबई, राजस्थान, मध्य प्रदेश, केरळ तसेच दक्षिण भारतातील शहरांकडे जाणाऱ्या प्रवाशांना याचा उपयोग होऊ शकतो.
प्रवाशांच्या वाढत्या संख्येचा आणि स्थानिक नागरिकांच्या मागणीचा विचार करून रेल्वे प्रशासनाने या चार गाड्यांच्या थांब्याबाबत सकारात्मक निर्णय घ्यावा, अशी अपेक्षा व्यक्त करण्यात आली आहे. दरम्यान, गणेशोत्सवाच्या वातावरणात ‘उंदीरमामा’च्या माध्यमातून करण्यात आलेली ही अनोखी मागणी स्थानिकांमध्ये चर्चेचा विषय ठरली.
