चिपळूण – महाराष्ट्र दहशतवाद विरोधी पथकाने (एटीएस) राज्यभर राबविलेल्या व्यापक कारवाईदरम्यान रत्नागिरी जिल्ह्यातील चिपळूण येथेही धडक कारवाई करण्यात आली. पाकिस्तानस्थित गँगस्टर शहजाद भट्टीशी कथित डिजिटल संपर्क असल्याच्या संशयावरून चिपळूणमधील एका तरुणाला चौकशीसाठी ताब्यात घेण्यात आल्याची माहिती समोर आली आहे.
तपास यंत्रणांकडून मिळालेल्या प्राथमिक माहितीनुसार, सोशल मीडिया आणि इतर डिजिटल माध्यमांद्वारे पाकिस्तानस्थित काही संशयित व्यक्तींशी संपर्क असल्याचा तपास सुरू आहे. या तपासाचा भाग म्हणून एटीएसच्या पथकाने मध्यरात्री चिपळूणमध्ये छापा टाकून संबंधित तरुणाला ताब्यात घेतले. राज्यभर एकाच वेळी १५० हून अधिक ठिकाणी एटीएसने शोधमोहीम राबविली होती. छत्रपती संभाजीनगर, जालना, बीडसह विविध जिल्ह्यांमध्ये झालेल्या कारवाईदरम्यान मिळालेल्या माहितीतून चिपळूणचा धागा समोर आल्याचे सांगितले जात आहे.कारवाईदरम्यान संबंधित तरुणाचा मोबाईल फोन, सोशल मीडिया अकाउंट्स, चॅट्स तसेच इतर इलेक्ट्रॉनिक उपकरणे तपासासाठी जप्त करण्यात आली असून त्यांची फॉरेन्सिक पडताळणी केली जात आहे. संबंधित व्यक्तीची सखोल चौकशी सुरू असून तपासातून अधिक माहिती समोर येण्याची शक्यता आहे.
दरम्यान, या प्रकरणाबाबत महाराष्ट्र एटीएसकडून अद्याप कोणतेही अधिकृत निवेदन किंवा प्रसिद्धीपत्रक जारी करण्यात आलेले नाही. त्यामुळे पुढील तपासाच्या निष्कर्षानंतरच या प्रकरणाचे नेमके स्वरूप स्पष्ट होणार आहे.
