कुटगिरीत लोखंडी पूल कोसळला; १० ते १२ गुरे गर्डरखाली, एका बैलाचा मृत्यू
गुहागर – गुहागर तालुक्यातील कुटगिरी गावातील तिजना नदीवरील लोखंडी साकव कोसळल्याच्या दुर्घटनेत मृत्युमुखी पडलेल्या बैलाच्या मालकाला प्रशासनाने तत्परता दाखवत अवघ्या १८ तासांत ३२ हजार रुपयांची शासकीय आर्थिक मदत मंजूर करून धनादेश सुपूर्द केला.
३ ऑगस्ट रोजी सायंकाळी घडलेल्या या दुर्घटनेत साकवाखाली आठ जनावरे अडकली होती. ग्रामस्थांच्या मदतीने सर्व जनावरांची सुटका करण्यात आली. मात्र शेतकरी दिलीप लिंगायत यांच्या मालकीचा एक बैल मृत झाला, तर इतर जनावरे किरकोळ जखमी झाली. पशुवैद्यकीय विभागाने तातडीने घटनास्थळी पोहोचून जखमी जनावरांवर उपचार केले तसेच मृत बैलाचे शवविच्छेदन पूर्ण केले.
घटनेची माहिती मिळताच महसूल प्रशासनाने पंचनामा करून मदतीचा प्रस्ताव तातडीने मंजूर केला. मंगळवारी सकाळी उपविभागीय अधिकारी आकाश लिंगाडे, तहसीलदार परीक्षित पाटील, मंडळ अधिकारी, तलाठी आणि ग्राम महसूल अधिकारी यांच्या उपस्थितीत शेतकरी दिलीप लिंगायत यांना ३२ हजार रुपयांच्या मदतीचा धनादेश देण्यात आला. यावेळी जखमी जनावरांवर आवश्यक उपचार सुरू ठेवण्याच्या सूचना पशुवैद्यकीय विभागाला देण्यात आल्या. साकव दुर्घटनेनंतर प्रशासनाने दाखविलेल्या तत्परतेमुळे बाधित शेतकऱ्याला त्वरित आर्थिक दिलासा मिळाल्याची भावना परिसरातील नागरिकांनी व्यक्त केली.
