गुहागर – रत्नागिरी जिल्ह्यातील गुहागर शहरात रविवारी सायंकाळी घडलेल्या एका धक्कादायक घटनेने परिसरात खळबळ उडाली. किर्तनवाडी येथील गणेशमूर्ती कारागीर मंगेश माटल (वय ४५) यांच्यावर वैयक्तिक वाद आणि काही कारणांच्या पार्श्वभूमीवर कोयत्याने जीवघेणा हल्ला करण्यात आल्याची घटना घडली. या हल्ल्यात मंगेश माटल गंभीर जखमी झाले असून त्यांच्यावर प्राथमिक उपचारानंतर अधिक उपचारासाठी रत्नागिरी जिल्हा शासकीय (सिव्हिल) रुग्णालयात दाखल करण्यात आले आहे.
मिळालेल्या माहितीनुसार, मंगेश माटल आणि संशयित आरोपी हे दोघेही गुहागर शहरातील एका लॉजमध्ये एकत्र काम करत होते. परस्परांमध्ये चांगली ओळख असल्याने एकमेकांच्या घरी ये-जा होती. मात्र काही दिवसांपासून घरगुती वाद आणि काही कारणावरून दोघांमध्ये तणाव निर्माण झाला होता.
रविवारी सायंकाळी सुमारे ४ वाजण्याच्या सुमारास संशयित संदीप गीजे हा किर्तनवाडी येथील माटल यांच्या घरी पोहोचला. तेथे दोघांमध्ये वाद झाल्यानंतर त्याने संतापाच्या भरात कोयत्याने मंगेश माटल यांच्यावर सपासप वार केल्याचे सांगितले जात आहे. या हल्ल्यात त्यांच्या चेहरा, मान, डोके आणि हातावर गंभीर जखमा झाल्या. गंभीर अवस्थेतील माटल यांना प्रथम गुहागर ग्रामीण रुग्णालयात दाखल करण्यात आले. प्राथमिक उपचारानंतर त्यांची प्रकृती चिंताजनक असल्याने पुढील उपचारासाठी रत्नागिरी जिल्हा शासकीय रुग्णालयात हलविण्यात आले.
घटनेची माहिती मिळताच पोलीस निरीक्षक सचिन सावंत यांनी घटनास्थळी धाव घेऊन पंचनाम्याची प्रक्रिया सुरू केली. सायंकाळी उशिरा फॉरेन्सिक पथकानेही घटनास्थळी भेट देऊन पुरावे संकलित केले. या प्रकरणी रात्री उशिरापर्यंत कोणताही गुन्हा दाखल झालेला नव्हता. पोलीस सर्व बाजूंनी तपास करत असून हल्ल्यामागील नेमके कारण आणि घटनाक्रम उघड करण्याचे काम सुरू आहे.
