गुहागर – गुहागर तालुक्यातील एका सत्ताधारी पक्षाशी संबंधित स्वयंघोषित राजकीय पुढाऱ्याच्या कारभारामुळे स्थानिक वृत्तपत्र व्यावसायिकांमध्ये नाराजीचे वातावरण निर्माण झाले आहे. आपल्या वरिष्ठ नेत्याच्या वाढदिवसानिमित्त मोठ्या उत्साहात आणि दिखाव्याने विविध वृत्तपत्रांमध्ये जाहिराती देण्यात आल्या; मात्र त्या जाहिरातींचे पैसे तब्बल दोन वर्षे उलटूनही अद्याप देण्यात आले नसल्याची चर्चा सुरू आहे.
राजकीय नेत्यांच्या जवळीक दाखवण्यासाठी, स्वतःची प्रतिमा उंचावण्यासाठी आणि “आम्हीच खरे कार्यकर्ते” असा आव आणण्यासाठी अनेक जण मोठमोठ्या जाहिराती देतात. परंतु प्रत्यक्षात जाहिरातींचे बिल चुकते करण्याची वेळ आली की मात्र टाळाटाळ, बहाणे आणि कानाडोळा सुरू होतो. यामुळे स्थानिक पत्रकार, वृत्तपत्र प्रतिनिधी आणि जाहिरात व्यावसायिक आर्थिक अडचणीत सापडत आहेत.
विशेष म्हणजे, “नेत्यांच्या वाढदिवसाला लाखोंच्या जाहिराती” देणारे हेच पुढारी बिल भरण्याच्या वेळी गायब होतात, अशी भावना माध्यम क्षेत्रातून व्यक्त होत आहे. त्यामुळे भविष्यात राजकीय जाहिराती स्वीकाराव्यात की नाही, असा गंभीर प्रश्न अनेक वृत्तपत्र चालकांसमोर उभा राहिला आहे.
राजकारणात प्रसिद्धी मिळवणे वेगळे आणि आर्थिक जबाबदारी पार पाडणे वेगळे. जाहिरात दिली म्हणजे त्याचे पैसे वेळेत देणे ही किमान नैतिकता आणि व्यावसायिक प्रामाणिकता अपेक्षित असते. आता तरी संबंधित पुढाऱ्याने प्रलंबित जाहिरात बिलाची रक्कम अदा करून माध्यमांची थकबाकी फेडावी, अशी मागणी होत आहे. समझनेवालों को इशारा काफी है
