गुहागर – गुहागर तालुक्यातील देवघर, गिमवी परिसरामध्ये महावितरणच्या वीजबिलांबाबत अजब प्रकार समोर आला असून अनेक ग्राहकांना चुकीची व जादा आकारणी असलेली बिले मिळाल्याचा आरोप होत आहे.
महावितरणचा स्थिर आकार 130 रुपये असताना अनेक ग्राहकांच्या बिलामध्ये तब्बल 260 रुपयांची आकारणी करण्यात आल्याचे निदर्शनास आले आहे. यामुळे नागरिकांमध्ये संतापाचे वातावरण निर्माण झाले आहे.
ग्राहकांच्या मते, कोणतीही पूर्वसूचना किंवा स्पष्टीकरण न देता दुप्पट स्थिर आकार आकारण्यात येत असून सामान्य नागरिकांची आर्थिक लूट सुरू असल्याची भावना व्यक्त केली जात आहे. अनेकांनी बिल दुरुस्तीची मागणी केली आहे.
दरम्यान, नागरिकांनी वीजबिल भरताना बिलातील प्रत्येक तपशील काळजीपूर्वक तपासूनच पैसे भरावेत, अन्यथा चुकीच्या आकारणीमुळे आर्थिक नुकसान होऊ शकते, असे आवाहन स्थानिकांकडून करण्यात येत आहे. महावितरणने या परिसरात जी वीज बिल वाटप केले आहेत की पुन्हा एकदा तपासून दुरुस्त करून द्यावी अशी मागणी या परिसरातून केली जात आहे.
