चिपळूण – जिल्हा परिषद व पंचायत समिती निवडणूक प्रचाराच्या पार्श्वभूमीवर राज्याचे मुख्यमंत्री ना. देवेंद्र फडणवीस, भाजप प्रदेशाध्यक्ष आमदार रवींद्र चव्हाण यांची बुधवार दिनांक २८ रोजी दुपारी १ वाजता चिपळूण बहादूरशेखनाका येथील स्वातंत्र्यवीर सावरकर मैदानात भाजपा-शिवसेना युतीच्या उमेदवारांच्या प्रचारार्थ जाहीर सभा आयोजित करण्यात आली आहे.या सभेमुळे युतीच्या उमेदवारांना बळ मिळेल, असा विश्वास भाजप नेते प्रशांत यादव यांनी व्यक्त केला.
जिल्हा परिषद, पंचायत समिती निवडणूकीसाठी चिपळूण तालुक्यात शिवसेना भाजप युती झाली असून भाजप ३ जि. प. गटात, ७ पं. स. गणात तर शिवसेना ६ जि. प. गटात, ११ पं. स. गणात निवडणूक लढवित आहे. चिपळूण पंचायत समितीवर शिवसेना-भाजप युतीचा भगवा फडकवण्याचा युतीच्या नेते पदाधिकारी व कार्यकर्त्यांनी निर्धार केला आहे. तर जिल्हा परिषदेवर देखील जास्तीत जास्त उमेदवारदेखील निवडून पाठवण्यासाठी कंबर कसली आहे. तर आता बुधवार दिनांक २८ रोजी मुख्यमंत्री ना. देवेंद्र फडणवीस व भाजपचे प्रदेशाध्यक्ष आमदार रवींद्र चव्हाण चिपळूणमध्ये येत असल्याने त्यांच्या सभेला विशेष महत्त्व प्राप्त झाले आहे.
या सभेच्या अनुषंगाने प्रशांत यादव यांनी पत्रकारांशी संवाद साधताना म्हटले आहे की, शिवसेना भाजप युतीच्या उमेदवारांच्या प्रचाराच्या दृष्टीने मुख्यमंत्री ना. देवेंद्र फडणवीस, भाजपा प्रदेशाध्यक्ष आमदार रवींद्र चव्हाण यांची अत्यंत महत्त्वाची सभा होत आहे. या सभेने भाजपा पदाधिकारी, कार्यकर्ते तसेच युतीच्या उमेदवारांमध्ये उत्साह संचारला आहे. या सभेमुळे भाजपा-शिवसेनेला यश नक्कीच मिळेल, असा विश्वास यादव यांनी यावेळी व्यक्त केला. सभेची जय्यत तयारी अंतिम टप्प्यात आली असून यावेळी भाजपात पक्षप्रवेश करण्यास अनेक जण इच्छुक आहेत, असे देखील यादव यांनी यावेळी सांगितले.
