चिपळूण ; गोवळकोटमधील गोळीबार प्रकरणाचा उलगडा , दोघांना अटक

0
270
बातम्या शेअर करा

चिपळूण – चिपळूण शहरातील गोवळकोट रस्त्यावर काही दिवसांपूर्वी घडलेल्या गोळीबार प्रकरणाचा अखेर पोलिसांनी उलगडा केला असून याप्रकरणी चिपळूण पोलिसांनी दोन संशयितांना अटक केली आहे.
डुकराच्या शिकारीसाठी झाडलेली गोळी चुकून हायलाईफ इमारतीत घुसल्याचे तपासात निष्पन्न झाले असून, यामध्ये विनापरवाना बंदुकीचा वापर झाल्याचेही उघडकीस आले आहे.

शिकारीसाठी गेलेल्या विशाल विजय पवार आणि नितिन धोंडू होळकर या दोघांना चिपळूण पोलिसांनी या प्रकरणी अटक केली आहे. सध्या या दोघांना न्यायालयाने न्यायालयीन कोठडी सुनावली आहे. या प्रकरणात पोलिसांनी नितिन होळकरकडे असलेली विनापरवाना सिंगल बोअर बंदूक जप्त केली आहे.

ही घटना २९ जून रोजी सकाळी सुमारे ११ वाजता घडली. गोवळकोट रस्त्यावरील हायलाईफ इमारतीच्या पहिल्या मजल्यावर राहणाऱ्या अशरफ तांबे यांच्या स्वयंपाकघराच्या खिडकीतून गोळी घुसल्याने परिसरात एकच खळबळ उडाली होती. खिडकीची काच फोडत गोळी थेट घरात घुसल्याने काही काळ तणावाचे आणि भीतीचे वातावरण निर्माण झाले होते. या घटनेनंतर चिपळूण पोलीस ठाण्यात अज्ञाताविरोधात गुन्हा दाखल करण्यात आला होता. तपासादरम्यान गोपनीय माहितीच्या आधारे विशाल पवार आणि नितिन होळकर यांना ताब्यात घेण्यात आले. चौकशीत त्यांनी डुकराच्या शिकारीसाठी गोळी झाडल्याची कबुली दिली आहे. विशेष म्हणजे विशाल पवार यांची शेती हायलाईफ इमारतीच्या शेजारी आहे. नितिन होळकरने झाडलेली गोळी चुकून त्या दिशेने गेली आणि थेट अशरफ तांबे यांच्या घरात घुसली.या प्रकारामुळे परिसरातील नागरिकांमध्ये भीतीचे वातावरण निर्माण झाले असून, भविष्यात असे प्रकार टाळण्यासाठी कठोर कारवाईची मागणी होत आहे.या संपूर्ण प्रकरणाचा तपास पोलीस निरीक्षक फुलचंद मेंगडे यांच्या मार्गदर्शनाखाली गुन्हे प्रकटीकरण पथकाचे पोलीस उपनिरीक्षक ओम आघाव, वृशाल शेटकर, संदीप माणके, प्रितेश शिंदे, रोशन पवार आणि रुपेश जोगी आदींनी केला.


बातम्या शेअर करा

LEAVE A REPLY

Please enter your comment!
Please enter your name here