दापोली – रत्नागिरी जिल्ह्यात उमेदवारी अर्ज दाखल करण्याच्या शेवटच्या दिवशी दापोली खेड विधानसभा मतदारसंघात नामसाधर्म्याचे उमेदवार रिंगणात उतरवल्याने निवडणुकीतील रंगत वाढणार आहे.
दापोली मतदारसंघात उद्धव बाळासाहेब ठाकरे या गटाचे उमेदवार माजी आमदार संजय कदम यांच्या विरोधात तब्बल चार संजय कदम आणि आणि विद्यमान शिवसेना शिंदे गटाचे आमदार योगेश कदम यांच्या विरोधात तब्बल तीन योगेश कदम रिंगणात उतरले आहेत. त्यामुळे या मतदारसंघात रायगड लोकसभा निवडणुकीमध्ये जी स्थिती निर्माण झाली होती तीच स्थिती निर्माण झाली आहे.
पक्षाच्या अधिकृत उमेदवाराविरोधात त्याच्या नावासारखे नाव असलेला दुसरा उमेदवार उभा करण्याची पद्धत गेल्या दोन लोकसभा निवडणुकांमध्ये रायगड मतदारसंघात वापरण्यात आली होती.
या लोकसभा मतदारसंघात समावेश असलेल्या दापोली विधानसभा मतदारसंघातही यावेळी हाच प्रकार करण्यात आला आहे.
दापोलीमध्ये उद्धवसेनेकडून संजय कदम आणि शिंदेसेनेकडून विद्यमान आमदार योगेश कदम रिंगणात आहेत. त्यांनी आपले उमेदवारी अर्ज आधीच दाखल केले आहेत.
मंगळवारी त्यांच्या नावाशी साधर्म्य असणारे उमेदवारी अर्ज दाखल झाले. येथे संजय कदम नावाच्या तीन, तर योगेश कदम नावाच्या दोन अपक्षांनी उमेदवारी अर्ज दाखल केला आहे.त्यामुळे एकाच मतदारसंघात चार संजय कदम आणि तीन योगेश कदम असे अर्ज दाखल आहेत. त्यामुळे या मतदारसंघात आता नक्की कोणत्या संजय कदम आणि कोणत्या योगेश कदम निवडणूक जिकणार हे येणाऱ्या 23 तारखेला समजेल.
