गुहागर – गुहागर तालुक्यातील मुंढर वळवणवाडी येथील एका शेतकरी महिलेचा विषारी साप चावून दुर्दैवी मृत्यू झाल्याची घटना बुधवारी घडली.
सध्या शेतीची कामे सुरु असून शेतकरी वर्ग शेतीच्या कामात गुंतलेला आहे.तालुक्यातील मुंढर वळवणवाडी येथील शेतकरी महिला प्रभावती प्रकाश मोहित या आपल्या घराशेजारी असणाऱ्या शेतामध्ये गवत काढत असताना मोठया प्रमाणात वाढलेल्या गवतात दबाधारून बसलेल्या सापवर पाय पडल्याने सापने पायाला दंश केला.यावेळी त्यांनी आरडाओरडा केला मात्र आजूबाजूला कोणीच नसल्याने सदरचा साप सापडला नाही.त्यानंतर सदर महिला घरी आली व तीने शेजाऱ्यांना घडलेल्या घटनेची माहिती दिली.मात्र यावेळी त्यांना वेळीच वाहन न मिळाल्याने बराच वेळ गेला. थोड्या वेळाने वाहन मिळताच ग्रामस्थांनी त्याना त्या वाहनातून प्रा. आ. केंद्र तळवली येथे उपचारासाठी नेले.मात्र वैद्यकीय उपचार मिळण्यापूर्वीच सदर महिलेचा वाहनामध्येच मृत्यू झाला असल्याचे तळवली वैद्यकीय अधिकारी डॉ. देशमुख यांनी सांगितले.सदर महिलेला सर्प किंवा कांडर जातीचा साप चावला असल्याचा अंदाज व्यक्त करण्यात आला असून प्रभावती मोहित या गावी राहत होत्या.त्यांना दोन मुलगे व दोन मुली असून ते शहरात राहतात अचानक साप दंशाने दुर्देवी मृत्यू झाल्याने मुंढर वळवणवाडी परिसरात शोककळा पसरली आहे.
