रत्नागिरी- पैसे आणि सोन्यासाठी रत्नागिरी सिंधुदुर्गचे खासदार असलेल्या विनायक राऊत यांचे लोकांच्या खिशात हात जातात, असं त्यांच्याच पक्षाचे लोकप्रतिनिधी आता बोलत आहेत.
हे ऐकून फार आश्चर्य वाटलं नसलं तरीही खासदारकीची वैभवशाली परंपरा असलेला हा मतदार संघ आणि कोकण, या पेटी वाजवून सभ्यपणाचा आव आणणाऱ्या माणसामुळे बदनाम होतं आहे असा संताप भाजपा प्रदेश चिटणीस माजी खासदार निलेश राणे यांनी व्यक्त केला आहे.भारतीय जनता पक्षाचे प्रदेश चिटणीस तथा माजी खासदार निलेश राणे यांनी ट्विट करत विनायक राऊत यांचा समाचार घेतला आहे. त्यांच्याच पक्षाचे आमदार हेमंत पाटील यांनी विनायक राऊतांनी बांगर यांच्याकडून चेन घेतल्याचा गौप्यस्फोट केला त्याआधीच आमदार राजेश क्षिरसागर यांनीही राऊतांच्या कारनामे उघड केले होते. या सगळ्या घडामोडी नंतर निलेश राणे यांनी ही संतप्त प्रतिक्रिया दिली आहे. निलेश राणे यांनी म्हटले आहे की, खासदार विनायकराव बद्दल जे काय मागच्या पंधरा दिवसापासून त्यांच्याच पक्षातले सहकारी आमदार खासदार जे काय बोलतात ते ऐकून माझ्यासारख्या माणसाला आश्चर्य वाटलं नाही, कारण मला माहित होतं की हा माणूस तसाच आहे. पण वाईट या गोष्टीचा वाटतं याच्यामुळे कोकणाचे नाव खराब झालं. हा माणूस कोकणातून निवडून जातो, रत्नागिरी सिंधुदुर्ग मतदारसंघाचा खासदार आहे, असा माणूस महाराष्ट्रात बदनाम होणे हे आमच्या मातीसाठी, आमच्या कोकणासाठी ऐकायला बरं वाटत नाही.ते पुढे म्हणाले की, प्रत्येक गोष्टीसाठी हा माणूस पैसे खातो. प्रवासासाठी पैसे, हॉटेलसाठी पैसे, तिकीट द्यायला पैसे, स्वतःच्या निवडणुकीसाठी पैसे हा माणूस घेतो. आणि जर पैसे मिळाले नाही तर, अंगावर चेन किंवा जे काही सोनं असतं, ते पण लुटतो. असा आमच्या कोकणातून कधीच कोणी माणूस निवडून गेला नव्हता. पहिल्यांदा कोकणाला बदनाम करणारा माणूस आज खासदार म्हणून तिकडे निवडून गेलाय या गोष्टीचा दुःख वाटतं.एवढे पैसे एवढी वर्ष लोटून सुद्धा कधी त्या माणसाने कोकणामध्ये कधी संस्था उभी केली नाही. ना कधी कुठली फॅक्टरी उभी केली. पाच जणांना नोकऱ्या दिल्या नाहीत, पाच आरोग्य विषयी, कॅन्सर पेशंटना, डायलिसिससाठी कधी मदत केली नाही. खेळाडूंना मदत केली नाही. तुम्हाला एकही अस उदाहरण भेटणार नाही, कुठल्याही गावात भेटणार नाही किंवा शहरात भेटणार नाही की या माणसाने मला मदत केली असेल. दोन वेळा पंतप्रधान मोदी साहेबांच्या लाटेत हा माणूस निवडून गेला.पण एवढा ताट मानेने अस दाखवतो की, त्याच्यासारखा पेटी वाजवणार कोणच नाही. पण खरे धंदे हे, इथून तिथून लोकांच्या खिशात हात घालून पैसे काढणे, लुटणं, सोनं लुटणं. असा कधी खासदार करतो, अस मी ऐकलं नाही. जगाच्या नकाशामध्ये असा कुठला खासदार लोकांच्या अंगावर सोनं काढून घर चालवतो असं मी कधी बघितलं नाही. त्यामुळे जेंव्हा संधी येईल तेंव्हा योग्य न्याय आपण अशा माणसाला द्याल आणि योग्य ती जागा या माणसाला दाखवा असे आवाहन जनतेला निलेश राणे यांनी केले आहे.
