दापोली -एका महिलेने 93 लाख रुपये किमतीचे पाउंड कुरियरने पाठवले आहेत. ते कुरियर विमानतळावरून सोडवून घ्या असे प्रलोभन दाखवून जालगाव येथील एका व्यापाऱ्यांची तब्बल 30 लाख 73 हजार रुपयांची फसवणूक केल्याची तक्रार दापोली पोलीस ठाण्यात दाखल झाली असून दापोली पोलीस अधिक तपास करत आहेत.
दापोली जालगाव येथील विजय प्रभाकर खोत यांची जानेवारी 20 मध्ये अमेलिया जॅक्सन नावाच्या लंडन येथील एका महिलेशी फेसबुकवरून ओळख झाली. फेब्रुवारी मध्ये या महिलेने खोत यांच्या व्हाट्सएपवर एक पार्सल पाठविले आहे असा मेसेज केला, पार्सल मध्ये असलेल्या वस्तूंचे फोटोही व्हाट्सएपवर टाकले. त्यानंतर प्रिया शेठ या महिलेने तुमचे विमानतळावर कुरियर आले आहे त्यात फोटोत दाखविलेल्या वस्तू व 93 लाख रुपये किमतीचे पाउंड आहेत, त्यांनी यासंदर्भात कस्टम व रिझर्व्ह बँक या शासकीय आस्थापना यांची प्रमाणपत्रेही पाठविली होती, ही कागदपत्रे खरी असतील हे गृहीत धरून खोत यांनी त्यांच्याकडे मागणी केली जात होती तसे बँकेत पैसे भरले, फसवणूक करणाऱ्या व्यक्तीने खोत याना दोन एटीम कार्डही पाठवली या एटीएम द्वारे खोत यांनी 2 वेळा पैसेही काढले, या सर्व प्रकारात खोत यांनी तब्बल 30 लाख 73 हजार 100 रुपये या व्यक्तींनी पाठविलेल्या ई-मेल मध्ये दिलेल्या बँक खात्यात भरणा केले. त्यानंतर खोत याना कुरियर काही आले नाही त्यामुळे आपण फसले गेल्याचे विजय खोत यांचे लक्षात आल्यावर त्यांनी दापोली पोलीस ठाणे गाठून अमेलिया जॅक्सन, प्रिया शेठ, पूजा शर्मा यांचे विरोधात प्रलोभन दाखवून फसवणूक केल्याची तक्रार दाखल केली आहे, या तक्रारीनुसार दापोली पोलिसांनी माहिती तंत्रज्ञान कायद्याच्या अंतर्गत गुन्हा दाखल केला आहे, अधिक तपास पोलीस निरीक्षक राजेंद्र पाटील करत आहेत.
फेसबुक, व्हाट्सएप अशा सोशल मीडियातून फसवणुकीचे प्रकार घडत असून या लोकांच्या प्रलोभनाला आकर्षित होऊन अनेक व्यक्ती त्यांनी आयुष्यभराची जमवलेली पुंजी पणाला लावत असून त्यानंतर फसवणूक झाल्याचे लक्षात आल्यावर त्यांना मोठा धक्का बसत आहे, त्यामुळे कोणत्याही प्रलोभनाला बळी पडू नये असे आवाहन दापोली पोलीस ठाण्याचे पोलीस निरीक्षक राजेंद्र पाटील यांनी केले आहे.
