चिपळूण – चिपळूण तालुक्यातील सावर्डे येथील मंडळ अधिकारी अनिल जाधव याला जमिनीच्या खरेदीखताची नोंद करून देण्यासाठी पाच हजार रुपयांची लाच स्वीकारताना लाचलुचपत प्रतिबंधक विभागाने (एसीबी) बुधवारी (५ ऑगस्ट) दुपारी रंगेहात पकडले. या धडक कारवाईमुळे महसूल विभागात मोठी खळबळ उडाली असून, नागरिकांच्या कामांसाठी लाचेची मागणी होत असल्याच्या चर्चांना पुन्हा एकदा पुष्टी मिळाल्याची भावना व्यक्त होत आहे.
अधिक माहितीनुसार, तक्रारदाराने खरेदी केलेल्या जमिनीच्या खरेदीखताची नोंद गेल्या दोन वर्षांपासून प्रलंबित होती. संबंधित कार्यालयात वारंवार पाठपुरावा करूनही नोंद करण्यात येत नसल्याने तक्रारदाराला सतत हेलपाटे मारावे लागत होते. अखेर नोंद मंजूर करून देण्यासाठी मंडळ अधिकारी जाधव याने पाच हजार रुपयांच्या लाचेची मागणी केल्याचा आरोप करण्यात आला. याबाबत तक्रारदाराने लाचलुचपत प्रतिबंधक विभागाशी संपर्क साधला. प्राथमिक पडताळणीत तक्रार सत्य असल्याचे स्पष्ट झाल्यानंतर एसीबीच्या पथकाने बुधवारी सापळा रचला. ठरल्याप्रमाणे तक्रारदाराकडून पाच हजार रुपयांची रक्कम स्वीकारताच मंडळ अधिकारी अनिल जाधव याला रंगेहात ताब्यात घेण्यात आले. ही कारवाई पोलीस उपअधीक्षक अविनाश पाटील .पोलीस निरीक्षक मच्छिंद्र जाधव ,सुहास रोकडे सहकारी दीपक आंबेकर, , विशाल नलावडे,हेमंत पवार, राजेश गावकर, श्रेया विचारे शिरसागर यांच्या समवेत करण्यात आली. या कारवाईनंतर महसूल विभागाच्या कामकाजावर प्रश्नचिन्ह निर्माण झाले आहे. नागरिकांची वैध कामे मुद्दाम प्रलंबित ठेवून पैशांची मागणी करणाऱ्या प्रवृत्तीवर कठोर कारवाई व्हावी, अशी मागणी आता जोर धरू लागली आहे. एसीबीकडून पुढील कायदेशीर प्रक्रिया सुरू असून या प्रकरणाचा अधिक तपास सुरू आहे.
