गुहागर – गुहागर तालुक्यातील कर्दे गावाजवळ सोमवारी मुंबई–दोडवली मार्गावरील एसटी बसला अपघात झाला. चालकाचे वाहनावरील नियंत्रण सुटल्याने बस रस्त्यालगत पलटली. सुदैवाने या अपघातात कोणतीही जीवितहानी झाली नाही.
प्राथमिक माहितीनुसार, अपघाताच्या वेळी बसमध्ये एकही प्रवासी नव्हता. त्यामुळे मोठी दुर्घटना टळली. बसमध्ये केवळ चालक आणि वाहक हे दोघेच उपस्थित होते. अपघातात दोघांनाही किरकोळ दुखापत झाली असून त्यांच्यावर जवळच्या रुग्णालयात प्रथमोपचार करण्यात आले. दोघांचीही प्रकृती स्थिर असल्याची माहिती मिळाली आहे. अपघाताची माहिती मिळताच स्थानिक नागरिकांनी घटनास्थळी धाव घेत मदतकार्य केले. संबंधित यंत्रणांनी घटनास्थळी पोहोचून परिस्थिती नियंत्रणात आणली. अपघाताचे नेमके कारण शोधण्यासाठी पुढील तपास सुरू आहे.
