मार्गताम्हाणे – चिपळूण तालुक्यातील कळमुंडी येथील हनुमानवाडी परिसरात विश्वासघाताची धक्कादायक घटना उघडकीस आली आहे. ज्या मोलकरणीवर घराची जबाबदारी सोपवली होती, तिनेच साथीदाराच्या मदतीने बंद घराचा दरवाजा फोडून तब्बल ५ लाख ८८ हजार ६०० रुपयांचे सोन्याचे दागिने व रोख रक्कम चोरून नेल्याचा प्रकार समोर आला आहे. या घटनेने संपूर्ण परिसरात खळबळ उडाली असून, घरगुती मदतनीस ठेवताना पडताळणीचे महत्त्व पुन्हा एकदा अधोरेखित झाले आहे.
याप्रकरणी सुयोग संतोष बेलवलकर यांनी चिपळूण पोलीस ठाण्यात फिर्याद दाखल केली आहे. फिर्यादीनुसार, ३१ जुलै रोजी सकाळी ५ वाजल्यापासून १ ऑगस्ट रोजी सायंकाळी ७.०४ वाजेपर्यंत घर बंद असल्याची संधी आरोपींनी साधली. घराच्या मुख्य दरवाजाचा कडी-कोयंडा तोडून त्यांनी आत प्रवेश केला. त्यानंतर बेडरूममधील कपाट फोडून त्यातील मौल्यवान सोन्याचे दागिने आणि रोख रक्कम लंपास करण्यात आली. चोरीस गेलेल्या ऐवजात सोन्याचे मंगळसूत्र, चेन, कानातील दागिने, ब्रेसलेट, पेंडंट, अंगठ्या, नथ, सोन्याची नाणी, सोन्याचे मणी तसेच १८ हजार ६०० रुपयांची रोख रक्कम असा एकूण ५ लाख ८८ हजार ६०० रुपयांचा ऐवज असल्याचे फिर्यादीत नमूद करण्यात आले आहे.
प्राथमिक तपासात घरात काम करणाऱ्या मोलकरणीवर आणि तिच्या साथीदारावर संशय व्यक्त करण्यात आला असून, त्यांच्याविरोधात चिपळूण पोलीस ठाण्यात घरफोडीचा गुन्हा दाखल करण्यात आला आहे. आरोपींचा शोध सुरू असून पोलीस विविध तांत्रिक पुरावे आणि स्थानिक माहितीच्या आधारे तपासाची चक्रे वेगाने फिरवत आहेत. या घटनेमुळे नागरिकांमध्ये चिंता व्यक्त होत असून, घरगुती मदतनीसांची पोलीस पडताळणी, सीसीटीव्ही व्यवस्था आणि मौल्यवान वस्तूंच्या सुरक्षिततेबाबत अधिक दक्षता घेण्याची गरज असल्याचे मत व्यक्त केले जात आहे.
