अहमदपूर – ( अजय भालेराव ) – अहमदपूर नगरपरिषद हद्दीतील एका प्लॉटच्या गुंठेवारीचे नियमितीकरण करण्यासाठी मूळ शासकीय शुल्कापेक्षा अतिरिक्त रकमेची लाच मागितल्याप्रकरणी लातूर लाचलुचपत प्रतिबंधक विभागाने (ACB) अहमदपूर नगर परिषदेमधील प्रधानमंत्री आवास योजनेअंतर्गत कार्यरत शहरस्तरीय तांत्रिक तज्ज्ञ (CLTC) एस. बी. सोलापुरे आणि त्यांचा खाजगी एजंट शिवपुजे या दोघांविरुद्ध अहमदपूर पोलीस ठाण्यात भ्रष्टाचार प्रतिबंधक कायद्यान्वये गुन्हा दाखल करण्यात आला आहे.
अहमदपूर ; धावत्या कारला भीषण आग सुदैवाने जीवितहानी टळली!
शासकीय फी कमी करून देण्याचा बहाणा करत तक्रारदाराची फसवणूक करून लाचेची मागणी केल्याचे लाचलुचपत विभागाच्या पडताळणीत उघड झाले आहे.या प्रकरणातील ५२ वर्षीय तक्रारदार यांच्या पत्नीच्या नावावर अहमदपूर नगर परिषद हद्दीत प्लॉट असून, या प्लॉटच्या गुंठेवारीसाठी त्यांनी ६ महिन्यांपूर्वी नगर परिषदेत अर्ज केला होता. हे काम करून देण्यासाठी आरोपी कर्मचारी सोलापुरे यांच्या वतीने खाजगी एजंट शिवपुजे याने तब्बल १,२५,००० रुपयांच्या लाचेची मागणी केली होती, ज्यापैकी ३०,००० रुपये तक्रारदाराने आधीच रोख स्वरूपात दिले होते. मात्र, उर्वरित रकमेसाठी आरोपींकडून सातत्याने तगादा लावला जात असल्याने, अखेर वैतागलेल्या तक्रारदाराने लातूर एसीबीकडे अधिकृत तक्रार नोंदवली.तक्रारीच्या आधारे लाचलुचपत प्रतिबंधक विभागाच्या पथकाने २६ फेब्रुवारी २०२६ रोजी पंचांसमक्ष या प्रकरणाची पडताळणी केली. या पडताळणी दरम्यान धक्कादायक वास्तव समोर आले, ज्यामध्ये तक्रारदाराच्या प्लॉटचे वास्तविक शासकीय गुंठेवारी नियमितीकरण शुल्क केवळ १,१९,६२१ रुपये इतकेच होते. मात्र, आरोपी सोलापुरे आणि शिवपुजे यांनी मूळ शुल्क १,९१,००० रुपये असल्याचे खोटे सांगून, ते कमी करून देतो असे भासवत आधीच ३०,००० रुपये लाच लाटल्याचे मान्य केले. तसेच शासकीय शुल्काव्यतिरिक्त तब्बल ७१,३७9 रुपयांची अतिरिक्त लाच मागितल्याचे एसीबीच्या तपासात निष्पन्न झाले. यानंतर एक वेगळे वळण घेत ५ मार्च २०२६ रोजी तक्रारदाराने स्वतःहून नगर परिषद कार्यालयात जाऊन मूळ शासकीय शुल्क असलेली १,१९,६२१ रुपयांची रक्कम कायदेशीररित्या भरली आणि त्याची अधिकृत पावती मिळवली. तक्रारदाराने मूळ शासकीय शुल्क भरल्यामुळे व पुढे लाच स्वीकारली जाण्याची शक्यता नसल्याने एसीबीने लाच स्वीकृतीची प्रत्यक्ष सापळा कारवाई स्थगित केली, परंतु पडताळणीत लाच मागितल्याचा गुन्हा स्पष्ट सिद्ध झाल्याने कायदेशीर प्रक्रिया सुरू ठेवली.या संपूर्ण चौकशीअंती २१ मे २०२६ रोजी अहमदपूर पोलीस ठाण्यात आरोपी एस. बी. सोलापुरे आणि एजंट शिवपुजे यांच्याविरोधात गुन्हा गुन्हा नोंदवण्यात आला आहे. या प्रकरणी दोन्ही आरोपींना तूर्तास अटक करण्यात आली नसून, त्यांना नवीन फौजदारी कायद्याच्या कलम ३५(३) BNSS २०२३ अन्वये नोटीस बजावण्याची कायदेशीर तजवीज ठेवण्यात आली आहे. लातूर एसीबीचे पोलीस उपअधीक्षक संतोष बर्गे यांच्या मार्गदर्शनाखाली ही कारवाई करण्यात आली असून, पोलीस निरीक्षक विशाल बहात्तरे या प्रकरणाचा पुढील तपास करत आहेत. सध्या आरोपींची कार्यालये, वाहने आणि घरांची झडती घेण्याची सत्रे सुरू असून त्यांचे मोबाईल हँडसेट जप्त करण्याची प्रक्रिया सुरू आहे. नगर परिषदेतील या कारवाईमुळे लातूर जिल्ह्यातील लाचखोर कर्मचारी आणि दलालांच्या गोटात प्रचंड खळबळ उडाली आहे.
